लाडकी बहीण योजना राज्यात सुपरहिट ठरली. विधानसभा निवडणुकीच्या यशामागे लाडकी बहि‍णींचा मोठा वाटा आहे, असं म्हणत महायुती सरकारने विधानसभा निवडणुकीच्या विजयाचं श्रेय त्यांना दिलं होतं. विधानसभा निवडणुकीनंतर लाडक्या बहि‍णी डिसेंबरच्या हप्त्याच्या प्रतिक्षेत होत्या. डिसेंबरचा हप्ता महिनाअखेरपर्यंत लाभार्थ्यांच्या खात्यात जमा झाला होता. आता जानेवारीच्या हप्त्याची लाभार्थी महिला वाट बघत आहेत. अशातच उपमुख्यमंत्री अजित पवार यांनी लाडकी बहीण योजनच्या जानेवारी हप्त्याबाबात मोठी अपडेट दिली आहे.

लाडकी बहीण योजनेच्या बाबतीत राज्याचे उपमुख्यमंत्री अजित पवार यांनी मोठं वक्तव्य केलं आहे. लाडकी बहीण योजनेचे पैसे खात्यात कधी जमा होणार? याबाबात प्रश्न विचारले असता, अजित पवार यांनी मोठी माहिती दिली आहे. २६ तारखेच्या आत लाडक्या बहिणींचे पैसे खात्यात जमा होतील, असं अजित पवार म्हणालेत.

तसेच उद्यापासून विविध विभागांना भेटून बैठका घेणार असल्याचंही त्यांनी सांगितलं. यंदाचा अर्थसंकल्प हा आर्थिक शिस्त लावणारा असणार आहे. विधानसभा निवडणुकीनंतर आपली जबाबदारी वाढली आहे. महायुतीला लोकसभेला कमी जागा मिळाल्या होत्या. मात्र, आता वेगळं चित्र आहे. विधानसभेला आपल्याला चांगलं यश मिळाले. कोणतेही यश अपयश कायम नसतं. आपल्याला यात सातत्य ठिकवायचंय, असेही अजित पवार म्हणाले.

चुकीचं काम करणाऱ्यांची हकालपट्टी

सध्या पक्षात अनेकजण येत आहेत. पक्षाची बेरीज झाली पाहिजे. कमीपणा यायला नको. जनमानसात प्रतिमा खराब असलेल्या व्यक्तीला पक्षात स्थान नकोच. गैरवर्तणूक होता कामा नये. अशा सूचनाही अजित पवार केल्या. चुकीचं काम करणाऱ्यांची हकालपट्टी केली जाईल असंही अजित पवार यांनी स्पष्ट केलं.