लाडकी बहीण योजना सतत काही ना काही कारणाने चर्चेत असते. योजनेचे पैसे मिळावेत म्हणून अनेकांनी यामध्ये बरीच उलाढाल करत आपला नंबर लावला आहे. अशात आता नांदेडमधून देखील अशीच एक घटना समोर आली आहे. येथे लाडक्या बहिणीचे पैसे थेट भावाच्या खात्यात पोहचले आहेत.

मिळालेल्या माहितीनुसार, आधार कार्डवर खाडाखोड करत लाडक्या बहिणींचे पैसे पतीच्या खात्यात येतील अशा पद्धतीने फॉर्म भरला. मात्र नंतर योजनेची ही रक्कम थेट सीएससी केंद्र चालकाने हडपल्याची घटना घडली आहे. योजनेबाबत हा धक्कादायक प्रकार नांदेडच्या ता. हदगाव येथे उघडकीस आला आहे.

नेमकं काय घडलं?

सचिन सीएससी सेंटर चालकाने हा प्रताप केला असून लाडक्या बहि‍णींची फसवणूक करत त्याने लाखोंचा घोटाळा केला आहे. गावातील महिलांचे लाडकी बहीण योजनेसाठी अर्ज भरताना त्याने महिलांचा आधार क्रमांक टाकण्याऐवजी त्यांच्या पतींचा आधार क्रमांक टाकला होता. यावेळी त्यांचे खाते क्रमांक देखील देण्यात आले होते.

योजनेचे पैसे देखील त्यांच्या खात्यात जमा झाले. पुढे मात्र हे पैसे रोजगार हमी योजनेचे असल्याचे सचिन सीएससी सेंटर चालकाने सांगितले. पुढे त्याने रोजगार हमी योजनेतील विहिरींचे पैसे आले आहेत असे सर्वांना सांगितले. त्यानंतर ओळखीच्या पुरुषांकडून त्याने आधार कार्ड, बँक पासबुक ही कागदपत्रे मागवून घेतली. तसेच यावर पुरुषांचे अंगठे घेऊन जमा झालेली सर्व रक्कम स्वत:च्या खिशात घातली. मनाठा गावातील ३८ तर बामणी फाटा येथील ३३ व्यक्तींचा आधार क्रमांक वापरून तब्बल ३ लाख १९ हजार ५०० रुपये या व्यक्तीने लंपास केले आहेत.

सचिन सीएससी सेंटर चालकाचा प्रताप उघडकीस कसा आला?

गावातील अलीम सलीम कादरी यांना मोबाईलवर मुख्यमंत्री लाडकी बहीण योजनेचे पैसे खात्यात जमा झाल्याचा मॅसेज आला होता. त्यामुळे गावात याची एकच चर्चा सुरू झाली आणि सेंटर चालकाचं बिंग फुटलं.

चौकशी करण्याचे आदेश

घटनेची माहिती संबंधित तहसीलदार, उपविभागीय अधिकाऱ्यांना मिळाल्यावर त्यांनी या प्रकरणी अधिक चौकशीचे आदेश दिले आहेत. या प्रकरणात दोषींवर योग्य ती कारवाई केली जाईल असंही त्यांनी यावेळी सांगितलं.