कोल्हापुरात काळजाचा ठोका चुकवणारी घटना घडली आहे. फुलेवाडी फायर स्टेशनजवळ सुरू असलेल्या नव्या बांधकाम इमारतीचा स्लॅब अचानक कोसळला. या दुर्घटनेत काही बांधकाम कामगार अडकले. तर काहींना बाहेर काढण्यात यश आले आहे. या संपूर्ण घटनेने परिसरात सर्वत्र भी‍ती, चिंता आणि बांधकाम कामगार महिलांच्या आक्रोशाचे वातावरण निर्माण झाले आहे.

मिळालेल्या माहितीनुसार, कोल्हापूर महानगरपालिकेच्या अग्निशमन केंद्राचे बांधकामावर रात्री आठ-साडेआठच्या सुमारास स्लॅब टाकण्याचे काम सुरू होते. यादरम्यान अचानक जोराचा आवाज झाला आणि स्लॅब कोसळला. काही कामगार वर काम करत होते, तर काही स्लॅबच्या खाली होते. स्लॅब कोसळताच प्रचंड आवाज झाला आणि धावपळ उडाली. क्षणार्धात चार ते पाच कामगार ढिगाऱ्याखाली अडकले.

या दुर्घटनेनंतर स्थानिक नागरिक तत्काळ घटनास्थळी धावले. ढिगाऱ्याखाली अडकलेल्या कामगारांना वाचवविण्यासाठी त्यांनी हाताने कोसळलेल्या स्लॅबच्या तारा आणि सिमेंटचा ढीग उचलण्यास सुरुवात केली. ‘आमच्या डोळ्यासमोर हे घडत होते... त्यांचा आरडाओरडा ऐकून आम्ही घाबरलो. पण, वेळ वाया घालवला नाही. जीव धोक्यात घालूनही आम्ही ढिगारा बाजूला करण्यास सुरुवात केली,’ असे स्थानिकांनी सांगितले.

या घटनेने कामगार महिलांना जबर धक्का बसला. अडकलेले बहुतेक कामगार हे त्यांचेच सहकारी असल्याने त्या हंबरडा फोडून रडत होत्या. ‘त्यांना बाहेर काढा, त्यांना वाचवा,’ असे म्हणत त्या फायर ब्रिगेडच्या जवानांसमोर हात जोडून विनवणी करत होत्या. काही महिला तर अर्धवट बेशुद्ध झाल्या. त्यांना शेजारील नागरिकांनी पाणी पाजून आधार दिला. त्यानंतर त्यांना सीपीआर रुग्णालयात उपचारासाठी दाखल करण्यात आले.

स्लॅबच्या ढिगाऱ्यातून ठिकठिकाणी लोखंडी सळया बाहेर आल्या होत्या. सिमेंट-खडीचा ढीग डोंगरासारखा झाला होता. त्याखाली अडकलेल्यांची स्थिती न बघवणारी होती. जखमींना तातडीने शासकीय रुग्णालयात हलविण्यात आले. दुर्घटनेची बातमी कळताच कामगारांचे नातेवाईक घटनास्थळी दाखल झाले. स्थानिक नागरिक, मंडळातील तरुण, फायर ब्रिगेडचे जवान, पोलिस सगळेच एकत्र येऊन जीव वाचविण्यासाठी धडपड करत होते.