रणजीत माजगांवकर, साम टीव्ही

अमरावतीचं अयान प्रकरण ताजं असताना कोल्हापुरातून एक धक्कादायक आणि संतापजनक घटना समोर आली आहे. पुलाची शिरोली परिसरात एका तरुणाने सुमारे 15 पेक्षा अधिक तरुणींना प्रेमाच्या जाळ्यात ओढून त्यांचे अश्लील व्हिडीओ तयार करत ब्लॅकमेल केल्याचा गंभीर आरोप आहे. या प्रकरणामुळे संपूर्ण जिल्ह्यात खळबळ उडाली आहे. पोलिसांनी संशयिताला अटक करून पुढील तपास सुरू केला आहे.

हातकणंगले तालुक्यातील पुलाची शिरोली येथे घडलेल्या या प्रकाराने समाजमन हादरले आहे. 20 वर्षीय तरुणीने राजारामपुरी पोलिस ठाण्यात दिलेल्या फिर्यादीवरून हा प्रकार उघडकीस आला. त्यानंतर हा गुन्हा हातकणंगले पोलिसांकडे वर्ग करण्यात आला. पोलिसांनी शाहीद समीर सनदी या 22 वर्षीय संशयिताला अटक केली असून न्यायालयाने त्याला चार दिवसांची पोलिस कोठडी सुनावली आहे.

तपासात समोर आलेल्या माहितीनुसार, संशयित सोशल मीडियाच्या माध्यमातून 18 ते 22 वयोगटातील तरुणींशी संपर्क साधत होता. त्यानंतर त्यांना प्रेमाच्या जाळ्यात अडकवून लॉजवर बोलावून अत्याचार करत त्यांच्या आक्षेपार्ह व्हिडीओंचे चित्रीकरण करत होता. यानंतर हे व्हिडीओ व्हायरल करण्याची धमकी देत पीडितांचे मानसिक आणि शारीरिक शोषण केल्याचा आरोप आहे. शिरोली, हुपरी, हातकणंगलेसह परिसरातील अनेक गावांतील तरुणी या जाळ्यात अडकल्या असण्याची शक्यता पोलिसांनी व्यक्त केली आहे.

दरम्यान, या प्रकरणामुळे परिसरात भीती आणि संतापाचे वातावरण असून, पोलिसांकडून नागरिकांना सतर्क राहण्याचे आवाहन करण्यात आले आहे. या प्रकरणातील पुढील घडामोडींवर आमचे लक्ष राहणार आहे. या प्रकरणाचा सखोल तपास करण्यासाठी एसआयटी स्थापन करावी, अशी मागणी सकल हिंदू समाजाच्या वतीने संताजी बाबा घोरपडे यांनी केली आहे.