रणजित माजगावकर, कोल्हापूर

कोल्हापूर जिल्ह्यात अवैध दारू वाहतुकीविरोधात करवीर पोलिसांनी मोठी कारवाई केली आहे. पोलिसांनी गोव्यातून बेकायदेशीरपणे विदेशी दारू घेऊन येणाऱ्या एका जीपसह चालकाला ताब्यात घेतले आहे. या कारवाईत विदेशी दारू, वाहन आणि मोबाईल असा एकूण ८ लाख ७७ हजार २९० रुपयांचा मुद्देमाल जप्त करण्यात आला आहे.

पोलिसांकडून मिळालेल्या माहितीनुसार, गोव्यातून मोठ्या प्रमाणात विदेशी दारू कोल्हापूर शहरात विक्रीसाठी आणली जाणार असल्याची गोपनीय माहिती करवीर पोलिसांना मिळाली होती. या माहितीच्या आधारे गुन्हे शोध पथकाने गारगोटी-कोल्हापूर मार्गावरील कळंबा नाक्याजवळ सापळा रचून संशयित वाहनांची तपासणी सुरू केली.

दरम्यान, गोव्याच्या नोंदणी क्रमांकाची काळ्या रंगाची जीप (जीए-०३-वाई-१३६३) त्या मार्गावरून येताना दिसताच पोलिसांनी तिला थांबवून तपासणी केली. वाहनाची झडती घेतली असता त्यामध्ये गोवा बनावटीच्या विदेशी दारूचे बॉक्स आढळून आले. यानंतर पोलिसांनी वाहन चालक गजानन दिनकर पाटील (वय ४९) याची चौकशी केली. चौकशीदरम्यान संबंधित चालकाकडे विदेशी दारू बाळगण्याचा किंवा तिची वाहतूक करण्याचा कोणताही वैध परवाना नसल्याचे उघड झाले. तसेच ही दारू गोव्यातून आणून कोल्हापूरात विक्रीसाठी आणत असल्याची कबुलीही त्याने दिल्याची माहिती पोलिसांनी दिली.

या कारवाईत पोलिसांनी १ लाख ६९ हजार २९० रुपयांची विदेशी दारू, ७ लाख रुपयांची जीप आणि ८ हजार रुपयांचा मोबाईल फोन असा एकूण ८ लाख ७७ हजार २९० रुपयांचा मुद्देमाल जप्त केला. अवैध दारू वाहतुकीवर आळा घालण्यासाठी पोलिसांकडून सातत्याने विशेष मोहीम राबविण्यात येत आहे. याप्रकरणी गजानन दिनकर पाटील याच्याविरुद्ध महाराष्ट्र दारूबंदी कायद्यान्वये गुन्हा दाखल करण्यात आला आहे. या प्रकरणाचा पुढील तपास करवीर पोलीस ठाण्याचे अधिकारी करत असून, या अवैध व्यवहारामागे आणखी कोणाचा सहभाग आहे का, याचाही शोध घेतला जात आहे.