रणजीत माजगावकर, कोल्हापूर

Kolhapur News: कोल्हापुरमध्ये (Kolhapur News) हनुमान मंदिरामध्ये (Hanumar Temple) चोरीची मोठी घटना समोर आली आहे. कागल तालुक्यातील वंदूर इथे ही घटना घडली. चोरट्यांनी मंदिराती हनुमानाच्या मूर्तीवरील एक किलो चांदीच्या मुकुटासह १० किलो वजनाची चांदीची प्रभावळ लांबवली आहे. चोरट्यांनी तब्बल ६ लाख ६० हजार रूपयांच्या ११ किलो चांदीची चोरी केली. पहाटे ५ वाजता पुजारी मंदिरात पूजेसाठी आल्यानंतर ही घटना उघडकीस आली. या घटनेमुळे वंदूर गावामध्ये एकच खळबळ उडाली आहे.

मिळालेल्या माहितीनुसार, वंदूर गावच्या मध्यवस्तीत ग्रामदैवत हनुमानाचे मंदिर आहे. दररोज पहाटे पाच वाजता मंदिर पूजेकरिता उघडण्यात येते आणि रात्री आरती करून साठेआठ वाजता बंद केले जाते. विश्वनाथ रामचंद्र गुरव मंदिरात नियमित पूजा करत असतात. आज पहाटे ते मंदीरात पूजेकरीता आले होते. यावेळी मंदिराचा मुख्य दरवाजा आणि गाभार्‍याच्या दरवाजाचे कुलूप तोडल्याचे त्यांच्या निदर्शनास आले. तर गाभाऱ्यातील हनुमानाच्या मुर्तीचा चांदीचा मुकूट आणि चांदीची प्रभावळ चोरीला गेल्याचे त्यांना दिसून आले.

गुरव यांनी ही माहिती शिवसिंग घाटगे यांना दिली. तसेच मंदिरात चोरी झाल्याचे कागल पोलिसांना कळविण्यात आले. कागल पोलीस ठाण्याचे प्रभारी पोलीस निरीक्षक डॉ. वाघ यांनी कर्मचार्‍यांसह घटनास्थळी जाऊन पंचनामा केला. तसेच श्वान पथकाला पाचारण करण्यात आले. मंदीरातील चोरीची घटना गावात वाऱ्यासारखी पसरल्याने अनेक ग्रामस्थांनी मंदिराकडे धाव घेतली.

चोरट्यांनी मंदिरातील मुर्तीवरील 1 किलो वजनाचा चांदीचा मुकूट आणि मुर्तीच्या भोवती असलेली दहा किलो वजनाची चांदी चोरून नेली. मंदीराच्या पाठीमागे असलेल्या कागल - सिध्दनेर्ली रोडवरील एका शेतात ही प्रभावळ नेऊन त्याची चांदी काढून घेतली. तर त्याची लाकडी कमान शेतात टाकून पलायन केले.

श्वान पथक मंदिरापासून प्रभावळ टाकलेल्या शेतात जाऊन घुटमळले. सदाशिव लोकरे या ग्रामस्थाने दहा वर्षांपूर्वी ही प्रभावळ मंदिराला दान केली होती. चोरट्यांनी ११ किलो वजनाची आणि ६ लाख ६० हजार रूपये किंमतीची चांदी चोरीला गेल्याचे फिर्यादीत नमूद केले. पोलीस विविध मार्गाने चोरीचा तपास करत आहेत. मात्र गावात सीसीटीव्ही नसल्याने तपासात अडथळा निर्माण होत आहे.