कोल्हापूर : राज्यात दिवसेंदिवस धक्कादायक घटना समोर येत आहेत. अशीच एक धक्कादायक घटना कोल्हापूर जिल्ह्यातील आजरा इथे घडली आहे. महिनाभरापूर्वी विवाह झालेल्या नवदाम्पत्याचा गॅस गिझरच्या लिकेजमुळे गुदमरून मृत्यू झाल्याची दुर्दैवी घटना समोर आली आहे. सागर सुरेश करमळकर (वय ३२) आणि सुषमा सागर करमळकर (वय २६) असं नवदाम्पत्याची नावं आहेत. महिनाभरापूर्वी विवाह झालेले करमळकर दाम्पत्य हे फिरण्यासाठी आंबोली येथे रविवारी दुपारच्या दरम्यान गेले होते.

आंबोलीहून परतल्यानंतर त्यांच्या भावेश्वरी कॉलनी येथील घरामध्ये असताना त्यांचा फोन उचलला जात नव्हता. कालांतराने फोन स्विच ऑफ झाल्याने मित्र परिवाराने सोमवारी सकाळी त्यांच्या घरी भेट देऊन माहिती घेण्याचा प्रयत्न केला असता गॅस गिझरचा गॅसलिकेज होऊन बाथरूममध्येच त्यांचा गुदमरून मृत्यू झाल्याचं निदर्शनास आलं. घरामध्ये सर्वत्र गॅसचा वास होता. त्यामुळे गॅस लिकेजनेच सदर मृत्यू झाल्याची चर्चा परिसरात होती. मोठा मित्रपरिवार असणाऱ्या सागरच्या या दुर्दैवी मृत्यूमुळे सर्वत्र हळहळ व्यक्त होत आहे. त्याच्या पश्चात आई आणि भाऊ असा परिवार आहे.

२ वर्षांच्या मुलासह बायकोला विष दिलं, मग स्वत:

दरम्यान, धाराशिवमध्ये देखील एक धक्कादायक घटना उघडकीस आली आहे. नवऱ्याने बायको आणि २ वर्षांच्या मुलाची हत्या करून आत्महत्या केल्याची घटना घडली आहे. धाराशिवात बावीमध्ये ही घटना घडली आहे. धाराशिवमधील या घटनेने परिसरात खळबळ उडाली आहे.

मिळालेल्या माहितीनुसार, धाराशिवमधील बावी येथे पत्नीसह दोन वर्षांच्या मुलाची हत्या करून ३० वर्षीय तरुणाने आत्महत्या केल्याची घटना घडली आहे. ऑनलाइन जुगारात सर्व गमावलं. त्यानंतर कर्जाबाजारीपणातून तरुणाने टोकाचं पाऊल उचलल्याचं बोललं जात आहे. तरुणाच्या आत्महत्येचं कारण अद्याप समोर आलेलं नाही. लक्ष्मण मारुती जाधव असे या आत्महत्या केलेल्या तरुणाचे नाव आहे.