अभिजित देशमुख
कल्याण : कल्याण कृषी उत्पन्न बाजार समितीमध्ये सर्वत्र चिखल, घाण, दुर्गंधीचे साम्राज्य पसरले आहे. रस्त्यांची दुरावस्था, (Kalyan) व्यापाऱ्यांना पिण्याच्या पाण्याची सुविधा नाही. याबाबत अनेकदा प्रशासनाकडे तक्रारी केल्या, मात्र प्रशासन व संचालक मंडळाने दुर्लक्ष केल्याचा आरोप एपीएमसी मार्केट (Bajar Samiti) मधील व्यापाऱ्यांनी केला. याकरिताच ५ ऑगस्टला कल्याण कृषी उत्पन्न बाजार समितीत कडकडीत बंद ठेवण्यात येणार आहे. (Tajya Batmya)

कल्याण कृषी उत्पन्न बाजार समितीच्या आवारात घाणीचे साम्राज्य पसरले आहे. रस्त्यांची दुरावस्था, सर्वत्र पसरलेला कचरा, रस्त्यावर साचलेला चिखल त्यामुळे पसरलेली दुर्गंधी यामुळे शेतकरी, व्यापारी, माथाडी, हमाल व ग्राहक यांचा जीव मेटाकुटीला आला आहे. बाजार आवारात मोठ्या प्रमाणात गाळ व शौचालायचे सांडपाणी रस्त्यावर आले असून परिणामी मार्केटमध्ये दुर्गंधी पसरली आहे. यामुळे शेतकरी, व्यापारी, माथाडी, हमाल व ग्राहक यांचे आरोग्य धोक्यात आले आहे. त्याचबरोबर बाजार आवारातील घनकचरा व्यवस्थापनाचा पुरता बोजवारा उडाल्यामुळे या घाणीच्या साम्राज्यात आणखीनच भर पडली आहे. कल्याण कृषी उत्पन्न बाजार समितील व्यापारी मार्केट शेअर्सच्या स्वरूपात बाजार समितीला कर भरत असून कल्याण डोंबिवली महापालिकेला मालमत्ता कर भरतात. मात्र बाजार समिती प्रशासनाकडून सोयी सुविधा पुरवल्या जात नसल्याने व्यापारी आक्रमक झाले. 

तर संचालक मंडळ बरखास्त करा 

भाजपचे (BJP) माजी आमदार नरेंद्र पवार यांनी एपीएमसी मार्केटची पाहणी केली. यावेळी व्यापारी, माथाडी कामगारांशी चर्चा केली. आमदार नरेंद्र पवार यांनी बाजार समिती प्रशासन व संचालक मंडळाच्या कारभाराचा निषेध नोंदवला. व्यापाऱ्यांना सोयी सुविधा देणे गरजेचे आहे. मात्र तक्रार करणाऱ्या व्यापाऱ्यांना संचालक मंडळ वेठीस धरतेय. मुस्लिम व्यापाऱ्यांना बांगलादेशी व्यापारी म्हणून  हिनवतंय हे अत्यंत निषेधार्थ आहे. कल्याण कृषी उत्पन्न बाजार समितीत जरी शिवसेना भाजपची सत्ता असले तरी निवडून येणाऱ्या संचालक मंडळाला सोयी सुविधा देणे त्यांचे काम आहे. मात्र ते देऊ शकत नसतील तर हे संचालक मंडळ बरखास्त करा अशी मागणी सहकार मंत्र्यांकडे करणार असल्याचे माजी आमदार नरेंद्र पवार यांनी सांगितले.