अभिजित देशमुख, कल्याण

Kalyan Crime News In Marathi : शेजारच्या घरात झालेले भांडण सोडवण्यासाठी मध्यस्थी करणे तरुणाच्या चांगलेच अंगलट आले. भांडण सोडवायला आला म्हणून नशेखोर तरूणाने शेजारच्या तरुणाच्या कानाला चावा घेत तुकडाच पाडला. कल्याण पश्चिमेकडे ही घटना घडली.

कल्याण बाजारपेठ पोलिसांनी या प्रकरणी अजीम खान या तरूणाला अटक केली आहे. मिळालेल्या माहितीनुसार, नशेसाठी पैसे हवे होते म्हणून अजीमने घरात भांडण केले. शेजारी राहणाऱ्या तरुणाने मध्यस्थी करण्याचा प्रयत्न केला. पण रागाच्या भरात अजीमने तरुणाच्या कानाला चावा घेतला आणि तुकडाच पाडला.

कल्याण पश्चिमेकडील डॉ. बाबासाहेब आंबेडकर रोड परिसरात अजीम खान हा तरूण राहतो. तो व्यसनी आहे. नशेसाठी तो घरातल्यांकडे वारंवार पैशांची मागणी करत असे. पैसे दिले नाहीत तर तो भांडणही करत असे. नशेसाठी त्याने घरातील वस्तू देखील विकल्या आहेत. (Latest Marathi News)

त्याने शुक्रवारी पैशांसाठी पुन्हा भांडण उकरून काढले. जोरजोरात आवाज येत असल्याने अजीमचा भाऊ आणि शेजारी राहणारा त्याचा एक मित्र अख्तर घरात गेले. त्या दोघांनी अजीम याला पकडून वाद मिटविण्याचा प्रयत्न केला. मात्र संतापलेल्या अजीम याने अख्तरच्या कानाला जोरदार चावा घेतला आणि त्याच्या कानाचा तुकडाच पाडला. (Crime News)

या प्रकरणी कल्याणच्या बाजारपेठ पोलीस ठाण्यात तक्रार करण्यात आली. बाजारपेठ पोलिसांनी गुन्हा दाखल करीत अजीम याला अटक केली. पुढील तपास बाजारपेठ पोलीस ठाण्याचे पोलीस अधिकारी सुजित मुंडे करीत आहेत.