पंढरपूर - राष्ट्रवादी काँग्रेस शरद पवार गट पक्षाचे प्रदेशाध्यक्ष जयंत पाटील यांच्या भाजप प्रवेशाच्या चर्चांना जोर धरत असतानाच, त्यांनी "मी सगळ्यांच्या संपर्कात आहे" असे सूचक विधान करत चर्चांना अधिक बळ दिले आहे.

गेल्या काही दिवसांपासून जयंत पाटील पक्षांतर्गत नाराज असल्याच्या चर्चा सुरू आहेत. अलीकडेच त्यांनी भाजप प्रदेशाध्यक्ष चंद्रशेखर बावनकुळे यांची भेट घेतल्याने त्यांच्या भाजप प्रवेशाबाबत जोरदार चर्चा रंगली आहे. अर्थसंकल्पीय अधिवेशनादरम्यान मुख्यमंत्री देवेंद्र फडणवीस यांनी "जयंत पाटील माझं ऐकत नाहीत" अशी मिश्कील टिप्पणी केल्यानंतर या चर्चांना आणखी हवा मिळाली.

आज अकलूज येथे भाजप आमदार रणजितसिंह मोहिते पाटील यांच्या मुलाच्या विवाह सोहळ्यासाठी आले असताना, माध्यमांशी संवाद साधताना जयंत पाटील यांनी "मी सगळ्यांच्या संपर्कात आहे" असे विधान केले. त्यांच्या या वक्तव्यामुळे राजकीय वर्तुळात उलटसुलट चर्चांना उधाण आले आहे. त्यांच्या पुढील राजकीय भूमिकेकडे आता सर्वांचे लक्ष लागले आहे.