मराठा समाजाचे नेते मनोज जरांगे यांच्या नेतृत्वाखाली मराठा समाजाने मागण्यांसाठी काढलेल्या यशस्वी मोर्चा नंतर समाजाच्या मागण्या सरकराने मान्य केल्या. यानंतर मराठा आरक्षणाचे केंद्रबिंदू असलेल्या जालन्यात पोलीस पाटील भरती परीक्षामध्ये जरांगे इफेक्ट दिसून आला आहे. अंतरवाली सराटीसह अनेक गावांमध्ये कुणबी प्रमाणपत्राद्वारे ओबीसी आरक्षणातून मराठा समाजाच्या उमेदवाराची पोलीस पाटील म्हणून निवड करण्यात आली आहे.

मिळालेल्या माहितीनुसार, जालना जिल्ह्यातील ७२२ रिक्त पोलीस पाटील पदासाठी भरती परीक्षा पार पडली. जालना जिल्ह्यातील मराठा आरक्षणाचे केंद्रबिंदू असलेल्या अंतरवाली सराटीमध्ये ओबीसी प्रवर्गासाठी राखीव जागा ठेवण्यात आली होती. या जागेवर कुणबी प्रमाणपत्राद्वारे मराठा समाजातील तरुणीने पोलीस पाटीलकी मिळवली आहे. तसेच जालना जिल्ह्यातील अनेक गावांमध्ये कुणबी प्रमाणपत्रद्वारे मराठा समाजातील उमेदवारांनी पोलीस पाटीलकी मिळवल्याच समोर आल आहे.