अक्षय शिंदे, साम टिव्ही

पुण्यातील अश्विनी हगवणे प्रकरणानंतर महिलांवरील छळाच्या घटनांना आळा बसण्याचे नावच घेत नाहीये. अशातच जालन्यातून एक धक्कादायक बातमी समोर येत आहे. सासरच्या जाचाला कंटाळून एका विवाहित महिलेनं आत्महत्या केली आहे. नवीन व्यावसायासाठी महिलेकडून माहेरहून पैसे आणण्यासाठी तगादा लावण्यात येत होता. याच मानसिक त्रासाला कंटाळून तिनं राहत्या घरात गळफास घेऊन आयुष्य संपवलं. या घटनेनंतर परिसरात खळबळ उडाली आहे.

सृष्टी मणियार असं आत्महत्या केलेल्या विवाहितेचं नाव आहे. ती मंठा शहरातील मारवाडी भागात आपल्या सासरच्या मंडळींसोबत राहत होती. २०२४ साली तिचा विवाह संकेत मणियार याच्याशी झाला होता. मात्र, लग्नानंतर काही महिन्यांतच तिच्यावर माहेरहून पैसे आणण्यासाठी तगादा लावला जात होता. सासरच्यांना नवीन व्यवसाय सुरू करण्यासाठी पैशांची गरज होती, त्यामुळे सृष्टीवर सातत्याने पैशांसाठी दबाव टाकण्यात येत होता.

सासरच्या मंडळींकडून वारंवार मानसिक छळ केला जात होता. याच त्रासाला कंटाळून तिने राहत्या घरात गळफास घेत आयुष्य संपवलं. या घटनेची माहिती सृष्टीच्या आई वडिलांना मिळताच त्यांनी घटनास्थळी धाव घाव घेतली. तसेच पोलिसांनाही माहिती दिली. पोलिसांनी घटनास्थळी धाव घेत मृतदेह ताब्यात घेत रूग्णालयात शवविच्छेदनासाठी पाठवलं.

सृष्टीच्या आईने सासरच्या मंडळींवर गंभीर आरोप केले आहेत. या प्रकरणात मुलीच्या आईच्या फिर्यादीवरून पती संकेत मणियार, सासरा कैलास मणियार आणि सासू ,नणंद यांच्या विरोधात मंठा पोलीस ठाण्यामध्ये गुन्हा दाखल करण्यात आला आहे. दरम्यान, या घटनेनंतर परिसरात खळबळ उडाली असून, परिसरातील नागरिकांमध्ये संतापाची लाट उसळली आहे.