अक्षय शिंदे 
जालना : जालना येथील खरपुडी येथे सिडकोचा नवीन प्रकल्प उभारला जात आहे. यामुळे यात काही शेतकऱ्यांची जमीन जात आहे. मात्र सिडकोने व्यापाऱ्यांच्या जमिनीला अधिकचा मोबदला दिला असून शेतकऱ्यांच्या जमिनीला कमी मोबदला दिल्याचा आरोप करत या प्रकल्पाला शेतकऱ्यांनी विरोध दर्शविला आहे. 

जालन्यातील खरपुडी येथील होणाऱ्या सिडको प्रकल्पाला आता स्थानिक शेतकऱ्यांनी विरोध दर्शवला आहे. सिडको मधील संपादित होणाऱ्या सर्व शेतकऱ्यांना समान मोबदला देण्याची मागणी शेतकऱ्यांनी जिल्हाधिकाऱ्यांकडे केली आहे. दरम्यान या प्रकल्प उभारणीसाठी जमीन संपादित केली जात आहे. यामध्ये व्यापाऱ्यांसह काही शेतकऱ्यांच्या जमिनी देखील जात आहेत. या जमिनीचा मोबदला सिडकोकडून देण्यात येत आहे. 

जालन्यातील खरपुडे येथे होत असलेल्या सिडको प्रकल्पामध्ये काही शेतकऱ्यांना वाढीव मोबदला मिळत असून काही शेतकऱ्यांना अल्प मोबदला देण्यात येत असल्याचा आरोप शेतकऱ्यांकडून करण्यात येत आहे. यासाठी आज खरपुडी येथील शेतकऱ्यांनी जिल्हाधिकारी कार्यालयावर मोर्चा काढत या विरोधात आंदोलन करत घोषणाबाजी केली आहे. तसेच प्रकल्प उभारणीस विरोध दर्शविला आहे. 

समान मोबदला देण्याची मागणी 

दरम्यान सिडकोने व्यापाऱ्यांना अधिकचा मोबदला दिला असून स्थानिक शेतकऱ्यांना मात्र कमी मोबदला दिल्याचा आरोप यावेळी शेतकऱ्यांनी केला आहे. तर आम्हाला समान मोबदला मिळाला नाही; तर आम्ही देखील आमच्या जमिनी सिडकोला देणार नसल्याचा इशारा यावेळी शेतकऱ्यांनी दिला आहे.