अक्षय शिंदे 
जालना : शेतीचा जुना वाद सुरु असून याच जुन्या वादातून दोन गट एकमेकांच्या समोर आले. दोन्ही गटांमध्ये आंब्याच्या झाडाला दगड मारल्याच्या कारणावरून वाद होऊन बेदम हाणामारी झाल्याची घटना जालन्यातील भोकरदन तालुक्यातील पारध शिवारात समोर आली आहे. या हाणामारीमध्ये दोघेजण जखमी झाले असून या प्रकरणी पोलिसात गुन्हा दाखल करण्यात आला आहे. 

जालना जिल्ह्यातील भोकरदन तालुक्यातील पारध शिवारात जुना वाद आहे. जुन्या भांडणाच्या कारणावरून आणि आंब्याच्या झाडाला दगड मारल्याच्या क्षुल्लक कारणावरून दोन गटांत जोरदार हाणामारी झाली. सदर घटना ११ जूनला दुपारच्या सुमारास घडली. यात दोघांना जीवे मारण्याचा प्रयत्न करण्यात आला. दरम्यान हाणामारीच्या घटनेत वैभव लोखंडे आणि हर्षल पवार हे दोघे जखमी झाले आहेत. 

शेतात आंब्याचे झाड आहे सामायिक 

दरम्यान गोपाल लोखंडे यांनी भोकरदन पोलिस ठाण्यात दिलेल्या फिर्यादीनुसार त्यांचा भाऊ वैभव लोखंडे आणि मित्र हर्षल पवार यांच्यासोबत पारध शिवारातील शेतात होते. त्यावेळी अनिकेत लोखंडे, दत्ता त्र्यंबक लोखंडे, अरुण त्र्यंबक लोखंडे आणि दोन महिला तिथे आले. यातील आरोपी आणि फिर्यादी यांच्यात शेतीचा जुना वाद आहे. मात्र घटनेच्या दिवशी जुन्या भांडणावरून तसेच सामाईक आंब्याच्या झाडाला दगड मारल्याच्या कारणावरून वैभव लोखंडे आणि हर्षल पवार याना मारहाण केली.

चौघांवर गुन्हा दाखल 

या मारहाणीत वैभव व हर्षल जखमी झाले असून घटनेनंतर जखमी वैभव लोखंडे आणि हर्षल सांडु पवार यांना उपचारासाठी दाखल करण्यात आले आहे. याप्रकरणी जालन्यातील पारध पोलीस ठाण्यात एका महिलेसह चौघांवर गुन्हा दाखल करण्यात आला असून पोलीस अधिक तपास करत आहे. दरम्यान हाणामारीचा एक व्हिडिओ देखील समोर आला आहे.