संजय महाजन, जळगाव

Jalgaon Women Love Affair News जळगावातून एक धक्कादायक बातमी समोर आली आहे. मुलीचा साखरपुडा तोंडावर असताना आईने स्वतःच बॉयफ्रेंडशी लग्न केल्याचा धक्कादायक प्रकार घडला आहे. इतकचं नाही तर महिलेच्या बॉयफ्रेंडने लग्न केल्यावर त्याचा स्टेटसही ठेवण्यात आला होता. याप्रकरणी महिलेच्या पहिल्या पतीने पोलीस ठाण्यात तक्रार दाखल केली.

मिळालेल्या माहितीनुसार, जामनेर शहरातील एका भागात राहणाऱ्या कुटुंबात येत्या गुरुवारी मुलीचा साखरपुडा होणार होता. या कार्यक्रमाच्या तयारीसाठी घरात लगबग सुरू होती. नातेवाईकांचे येणे-जाणे वाढले होते. मात्र, दोन दिवसांपूर्वी घरातील महिलेने कोणालाही कोणतीही माहिती न देता अचानक घर सोडले. कुटुंबीयांनी तिचा सगळीकडे शोध घेतला, मात्र तिचा काहीच पत्ता लागला नाही.

दरम्यान, दुसऱ्याच दिवशी संबंधित महिलेच्या प्रियकराने आपल्या मोबाईलवरील स्टेटसवर दोघांनी लग्न केल्याचे फोटो अपलोड केले. हे फोटो पाहताच कुटुंबीयांना मोठा धक्का बसला. मुलीच्या साखरपुड्याच्या तयारीत असलेल्या कुटुंबावर या घटनेमुळे पायाखालची जमीन सरकली. पत्नीने प्रियकरासोबत लग्न केल्याचे फोटो पाहून हतबल झालेला पती थेट जामनेर पोलीस ठाण्यात पोहोचला.

मुलीचा साखरपुडा काही दिवसांवर आला असताना समाजात आमची बदनामी होत असल्याची तक्रार त्याने पोलिसांसमोर मांडली. तसेच पत्नी आणि तिच्या प्रियकराला मोबाईलवरील लग्नाचे स्टेटस काढायला सांगा अशी विनंतीही त्याने केली.पतीची व्यथा ऐकल्यानंतर पोलिसांनी तत्काळ संबंधित प्रियकराला पोलीस ठाण्यात बोलावून घेतले. यावेळी त्याला योग्य ती समज देण्यात आली. या प्रकरणात कोणताही गुन्हा दाखल करण्यात आलेला नसल्याची प्राथमिक माहिती समोर आली आहे.