आगामी स्थानिक स्वराज्य संस्थांच्या निवडणुकांच्या पार्श्वभूमीवर राज्यातील राजकीय घडामोडींना वेग आला आहे. जळगावमध्ये काँग्रेसला मोठा धक्का बसला असून, काँग्रेसच्या महाराष्ट्र प्रदेश उपाध्यक्षा प्रतिभा शिंदे यांनी पदाचा राजीनामा देत राष्ट्रवादी काँग्रेस अजित पवार गटात प्रवेश केला आहे. त्यांच्या या पक्षप्रवेशामुळे काँग्रेसला मोठा धक्का बसला आहे.

आज जळगावमध्ये उपमुख्यमंत्री अजित पवार यांच्या उपस्थितीत पक्षप्रवेशाचा मोठा सोहळा होत आहे. या सोहळ्यात मंत्री माणिकराव कोकाटे यांचीही उपस्थिती असणार आहे. माणिकराव कोकाटे यांनी प्रतिभा शिंदे यांचा राष्ट्रवादी काँग्रेस अजित पवार गटात प्रवेश होणार असल्याचं निश्चित केलं. हा पक्षप्रवेश सोहळा भव्य होणार असून, अजित पवार गटातील मुख्य नेतेही उपस्थित राहणार असल्याची माहिती आहे.

दररोज जळगाव जिल्ह्यात राष्ट्रवादी काँग्रेस अजित पवार गट बळकट होत असून, ती ताकद आम्ही प्रत्यक्षात उतरवणार आहोत, असं माणिकराव कोकाटे म्हणाले.

'स्थानिक स्वराज्य संस्थांच्या निवडणुका अपक्ष की युती, हा निर्णय पक्षस्तरावर घेतला जाईल. गिरीश महाजन यांनी स्वबळावर लढण्याचे संकेत दिले आहेत; मात्र त्यांनी त्यांच्या पक्षाचा विचार करायला हवा. स्वबळावर की महायुती म्हणून लढायचे, याबाबत अंतिम निर्णय आमचे नेते एकत्र बसून नीतीनुसार घेतील आणि त्याप्रमाणे आम्ही कार्य करू', असंही माणिकराव कोकाटे म्हणाले.

काँग्रेसला मोठा धक्का

गेल्या काही दिवसांपासून नाराज असलेल्या प्रतिभा शिंदे यांनी काही दिवसांपूर्वी तडकाफडकी राजीनामा दिला. यामुळे काँग्रेसला मोठा धक्का बसला. त्यांनी प्रदेशाध्यक्षांकडे राजीनामा सोपवला. राजीनामा पत्रात त्यांनी कोणताच उल्लेख केलेला नाही. मात्र, पक्षाला सोडचिठ्ठी देत त्यांनी भावनांना वाट मोकळी करून दिली. काँग्रेसमधून बाहेर पडण्यास जिल्हास्तरापासून राज्यस्तरावरील सगळेच लोक जबाबदार असल्याचा खळबळजनक आरोप शिंदे यांनी केला.