पाचोरा (जळगाव) : पाऊस पडला असल्याने घराच्या छतावर पाणी साचलेले होते. हे पाणी काढण्यासाठी छतावर गेलेल्या महिलेचा विद्युत तारांचा स्पर्श होऊन मृत्यू झाल्याची घटना पाचोरा तालुक्यातील वडगाव आंबे बुद्रुक येथे घडली. याप्रकरणी पाचोरा पोलीस स्टेशनला अकस्मात मृत्यूची नोंद करण्यात आली आहे.

पाचोरा (Pachora) तालुक्यातील वडगाव आंबे बु. येथील दुर्गाबाई नानू राठोड (वय ५०) असे सदरच्या घटनेत मृत झालेल्या महिलेचे नाव आहे. दुर्गाबाई राठोड यांचे गावात घर असून या घराजवळ लाकडी खांब उभारून त्याला विद्युत वाहिनीच्या तारा महावितरणाने बांधल्या आहेत. दरम्यान १६ जुलैला दुर्गाबाई राठोड या दुपारी घराच्या छतावर जाऊन पावसाचे साचलेले पाणी काढण्यासाठी गेल्या होत्या. यावेळी त्यांचा स्पर्श विद्युत वाहिनीच्या तारांचा झाला. यात त्यांना विजेचा जोरात झटका (Electric shock) बसल्याने त्या फेकल्या गेल्या. 

सदरची घटना कुटुंबीयांच्या लक्षात येताच त्यांनी तातडीने पाचोरा ग्रामीण रुग्णालयात उपचारासाठी नेले. येथे वैद्यकीय अधिकाऱ्यांनी त्यांना मयत घोषित केले. यावेळी कुटुंबीयांनी एकच आक्रोश केला. दरम्यान, या घटनेमुळे ग्रामस्थ संताप झाले असून या घटनेला महावितरण कंपनी जबाबदार असून संबंधित महिलेच्या कुटुंबियांना मदत करण्याची मागणी केली आहे.