जळगाव : जळगाव जिल्ह्यातील चोपडा विधानसभा मतदारसंघ महाविकास आघाडीतील शिवसेना ठाकरे गटाला सुटला आहे. त्यानुसार उमेदवार जाहीर झाल्यानंतर ऐनवेळेस ठाकरे गटाकडून उमेदवार बदलवून भाजपमधून आलेले प्रभाकर सोनवणे यांना आता उमेदवारी देण्यात आली आहे. 

विधानसभेच्या चोपडा (Chopda) मतदारसंघात महा विकास आघाडीचे उमेदवार म्हणून उद्धव ठाकरे गटाकडून राजू तडवी यांना उमेदवारी देण्यात आली होती. मात्र उमेदवारी अर्ज भरण्यासाठी शेवटचा एक दिवस बाकी असतानाच ही उमेदवारी आता प्रभाकर सोनवणे यांना देण्यात आल्याने राजकीय क्षेत्रात चर्चेचा विषय बनला आहे. (Shiv Sena) दरम्यान ठाकरे गटाकडून ऐनवेळी उमेदवार कोणत्या कारणामुळे बदलविण्यात आला हे चित्र अद्याप स्पष्ट झालेले नाही. 

दोन्ही सोनवणे आमने सामने 

चोपडा मतदार संघात मागील काळात लता सोनवणे या आमदार होत्या. यावेळी देखील महायुतीत हि जागा शिवसेना शिंदे गटाला सुटल्याने आता त्यांचे पती प्रा. चंद्रकांत सोनवणे यांना महायुती कडून उमेदवारी देण्यात आली आहे. आता त्यांच्या विरोधात प्रभाकर सोनवणे उमेदवार असल्याने प्रभाकर सोनवणे हे कशी लढत देतात? याकडे सगळ्यांचे लक्ष लागून आहे.