जळगाव : बोरी नदीच्‍या काठावर असलेल्‍या पिंप्री गावाला दोन्ही बाजूंनी पाण्याचा वेढा पडला आहे. ग्रामस्‍थांसाठी ही समस्‍या दरवर्षीची आहे. मुळात (Jalgaon) पिंप्री ते मोंढाळे मार्गावर पुलाची मागणी करूनही प्रश्न मार्गी लागलेला नाही. यंदा तर मागील २२ दिवसांपासून वेढा असल्‍याने विद्यार्थी (Student) देखील शाळेत जावू शकत नसल्‍याचे वास्‍तव आहे. (Jalgaon News Bori River)

पिंप्री गावाला एका बाजूने बोरी नदी (Bori River) तर दुसऱ्या बाजूने नाला आहे. नाला व नदीला पाणी असल्याने गावाला पाण्याचा वेढा पडला आहे. गावाच्या डाव्या व उजव्या अशा दोन्ही बाजूला केटीवेअर बंधारे आहेत. पिंप्रीच्या बाजूला हाकेच्या अंतरावर मोंढाळे गाव आहे. तर बोरी नदीला वर्षभर पाणी राहत असल्याने तसेच गावालगतच्या बोरी नदीवरील दोन केटीवेअर वर्षभर भरलेले असल्याने नागरिकांना ये- जा करता येत नाही. त्यामुळे मोंढाळे जाण्यासाठी पिंप्रीच्या विद्यार्थ्यांसह ग्रामस्थांना पिंप्रीहून टोळी व टोळीहून मोंढाळे जावे लागते.

पुल उभारणीची मागणी

पिंप्री ते मोंढाळे या बोरी नदीवर पुल उभारणी मागणी तसेच पिंप्री ते टोळी या रस्त्याची शासनाकडे वेळोवेळी मागणी केली केली आहे. परंतु याकडे प्रशासनाचे दुर्लक्ष आहे. पारोळा शहरापासून ७ किलोमीटर अंतर असलेल्या गावाला आता पाण्यामुळे १४ किलोमीटरचा रस्ता पार करुन जावे लागते. यामुळे विद्याथ्यांचे शैक्षणिक नुकसान होत आहे. तर प्रवाशांना पायपीट करावी लागत आहे.