पाचोरा (जळगाव) : पाचोरा येथील शीतल पाटील यांची रांगोळी कला देशाच्या सीमा ओलांडून सातासमुद्रापार पोहचली. स्पेनमधील पवित्र महोत्सवासाठी त्यांच्या रांगोळीची निवड झाली आहे. त्यांच्या या यशाचे व कलेचे कौतुक होत आहे. (jalgaon-news-pachora-shital-patil-art-selection-spain-pavitra-mahotsav)

स्पेनमधील सांतीयागो या शहरात ५ ते ११ वर्षाच्या अंतराने जेकेबिन (पवित्र) वर्ष साजरे केले जाते. यानिमित्ताने स्वर्गाचे दरवाजे उघडले जातात व परमेश्वर सर्वांच्या चुका माफ करून सुख- समृद्धी प्रदान करतो; अशी यामागील श्रध्दा व भावना आहे. ‘अल्फ कामिनो दि सांतीयागो' या आंतरराष्ट्रीय संस्थेच्यावतीने हा पवित्र महोत्सव साजरा केला जातो.

तीस देशातील कलावंतांची निवड

स्‍पेनमध्‍ये आयोजित महोत्‍सवात जगातील विविध ठिकाणी कलाकारांची निवड केली जाते. या पवित्र महोत्सवासाठी ३० देशातील २० रांगोळी कलावंतांच्या कलेची निवड करण्यात आली असून भारतातून सांगलीचे आंतरराष्ट्रीय रांगोळी कलावंत किरण शिंदे यांच्या नेतृत्वाखाली २५ भारतीय कलावंतांची निवड करण्यात झाली आहे. त्यात पाचोरा येथील शीतल पाटील यांचा समावेश आहे. त्यांनी उत्कृष्ट रंगसंगती साधत आकर्षक व मनोवेधक गालीचा रांगोळी रेखाटून ती या महोत्सवात सादर करून भारताचे नेतृत्व केले.