जळगाव : मुंबई येथे उपचारासाठी गेलेल्‍या पत्‍नीचा मृत्यू झाला. याची बातमी मुलाकडून पतीला समजली. पत्‍नीचे अंत्‍यसंस्‍कार करण्याची तयारी पहाटे करायची होती. परंतु, आपली अर्धांगिनी गेल्‍याचे दुःख अनावर झाले अन्‌ घरी एकट्या असलेल्‍या पतीने गळफास घेत जीवनयात्रा संपविली. (jalgaon-news-newsofhiswife'sdeath-the-husband-so-took-the-gallows-and-suicide)

लाडली (ता. धरणगाव) येथील मुळ रहिवासी अरूण खंडू सोनवणे हे जळगावातील नागसेननगरात पत्नी मीराबाई आणि मुलगा अनिकेत यांच्यासह वास्‍तव्‍यास होते. जळगाव कृषि उत्पन्न बाजार समितीत हमालीचे काम करून कुटुंबियांचा उदरनिर्वाह करत होते. मागील काही महिन्यांपासून मिराबाई सोनवणे यांना दुर्धर आजार जडला होता. उपचारासाठी काही दिवसांपुर्वी त्‍यांना मुंबई येथे नेण्यात आले होते. त्यांच्यासोबत त्यांचा मुलगा अनिकेत होता.

भाऊ आल्‍यानंतर प्रकार उघडकीस

मीराबाई सोनवणे यांच्‍यावर मुंबईत उपचार सुरू असताना रविवारी (३१ ऑक्टोबर) त्‍यांचा मृत्यू झाला. त्यावेळी अरूण सोनवणे हे जळगावात घरी एकटेच होते. मुलगा अनिकेत याने वडीलांना फोन करून माझी आई गेली..म्‍हणून फोन केला. पत्नी मिराबाईच्या मृत्‍यूची बातमी एकताच अरुण सोनवणे यांना धक्‍का बसला. पत्‍नीच्‍या मृत्यूचा धसका घेवून घरी एकट्या असलेल्‍या अरुण सोनवणे यांनी गळफास घेवून आत्महत्या केली. सोनवणे यांचे लहान भाऊ सुनिल सोनवणे हे सकाळी घरात आवराआवर करण्यासाठी आले असता सदर प्रकार समोर आला.