मुक्ताईनगर (जळगाव) : कोरोना वैश्विक महामारीमुळे गेले १७ महिन्यांपासून भाविकांना दर्शनासाठी बंद करण्यात आलेले संत मुक्ताबाई समाधीस्थळ कोथळी मुक्ताईनगर जुने मंदीर आज पहाटेपासून दर्शनार्थ खुले करण्यात आले. यामुळे भाविकांची गर्दी झाली होती. (jalgaon-news-Muktabai-Samadhisthala-temple-open-for-darshan-Crowd-of-devotees)

कोरोना महामारीमुळे सर्वच मंदिर दर्शनासाठी बंद होते. गतवर्षी नवरात्रोत्‍सवात देवीचे दर्शन न झाल्‍याने भाविकांचा हिरमोड झाला होता. यंदा मात्र कोरोना संसर्ग काहीसा कमी झाल्‍याने टप्‍प्‍याटप्‍प्‍याने सेक्‍टर सुरू केले. त्‍यानुसार घटस्थापनेच्या मुहूर्तावर मंदिर खुले करण्याची परवानगी देण्यात आली. यामुळे देवीच्‍या दर्शनाचा मार्ग खुला झाला आहे.

मुक्‍ताई मंदिरात गर्दी

शासनाने घालून दिलेल्या निर्देशानुसार योगायोगाने संत मुक्ताबाई जयंती दिनी नवरात्रौत्सव घटस्थापनेच्या शुभमुहूर्तावर भाविकांना सातला दर्शनासाठी खुले करण्यात आले. दर्शनासाठी आसुसलेल्या भाविकांना प्रदिर्घ कालावधीनंतर प्रत्यक्ष गाभाऱ्यात जावून पदस्पर्श दर्शन घेता आले. त्यामुळे आनंदाचे वातावरण पसरले आहे.

पहाटे अभिषेक, पुजा

आज पहाटे आदिशक्ती मुक्ताबाईस मानाची अभिषेक पुजा, आरती संस्थानचे अध्यक्ष रविंद्र पाटील यांनी केली. यावेळी पुजारी विनायक व्यवहारे, व्यवस्थापक उद्धव जुनारे, वारकरी सेवा संस्थेचे पुरूषोत्तम वंजारी, निवृत्ती पाटील, गणेश अढाव व असंख्य भाविक उपस्थित होते.