जळगाव : देशातील वाढती महागाई आणि इंधनाच्या वाढत्या किंमतीमुळे सर्वसामान्यांना मोठा फटका बसत आहे. इंधनाच्या किंमती वाढत असल्याचे चित्र दिसत असल्याने वाढत्या महागाईच्या मुद्यावरुन काँग्रेस आक्रमक झाली. या महागाई विरोधात तसेच इंधन दरवाढ संदर्भात चोपडा शहर व ग्रामिण काँग्रेस (Congress) कमिटीच्यावतीने महागाई मुक्त भारतसाठी धरणे आंदोलन करण्यात आले. (jalgaon news Inflation Free India Movement Congress hold on chopda)

काँग्रेसचे माजी जिल्हाध्यक्ष अॅड. संदीप पाटील यांच्या नेतृत्वाखाली आज (१ एप्रिल) सकाळी अकराला तहसील कार्यालयावर महागाई मुक्त भारतसाठी धरणे आंदोलन करण्यात आले. यावेळी तहसीलदार अनिल गावीत यांना निवेदन देण्यात आले.

आठ वर्षांपासून महागाई वाढतेय

सन २०१४ पासून केंद्रात भारतीय जनता पार्टीचे (BJP) सरकार स्थापन झाले आहे. या सरकारचे नेतृत्व देशाचे पंतप्रधान नरेंद्र मोदी (Narendra Modi) करत आहेत. परंतु गेल्या ८ वर्षापासून देशात सतत महागाई वाढत आहे. त्यामुळे सामान्य जनतेला जीवन जगणे कठीण झाले आहे. या कालावधीत देशात कोणतीही बेरोजगारी कमी न करता सतत महागाई वाढवून सामान्य जनतेची मोठ्या प्रमाणावर लुट केली जात आहे. सद्यस्थित इंधनाचे दर तर सतत वाढून गगनाला भिडलेले आहेत. त्याचा परिणाम इतर सर्व जीवनावश्यक वस्तूंच्या किंमती सामान्य जनतेच्या आवाक्याबाहेर जाताना दिसत आहेत. या विरोधात कॉंग्रेसने आंदोलन केले.