जळगाव : जिल्ह्यात आतापर्यंत झालेला पाऊस हा कमी व काही भागातच पडला आहे. जुलै महिन्‍याचा अंतिम आठवडा सुरू असताना देखील अनेक भागांमध्‍ये पाऊस नसल्‍याने पेरणी होवू शकलेली नाही. मात्र ऑगस्टच्‍या पहिल्‍या आठवड्यात म्‍हणजे ३ ते ६ ऑगस्‍ट दरम्‍यान मुसळधार पावसाचा अंदाज वर्तविला आहे. (jalgaon-news-heavy-rain-alert-in-Meteorological-Department-on-jalgaon-district)

जुलै महिन्‍यात पाऊस कमीच

गेल्या पाच वर्षापासून जुलै महिन्यात पडणाऱ्या पावसाचे प्रमाण वर्षानुवर्षे कमी कमी होत आहे. गेल्या पाच सहा वर्षाचा पावसाचे जुलै महिन्यातील गणित पाहता जुलै महिन्यात कमी पाऊस पडत असल्याचे चित्र आहे. सॅटेलाईटद्वारे आकाशातील पावसाची स्थिती पाहिली असता येत्या ३१ जुलैपर्यंत पाऊस कधी कमी, कधी जास्त पडेल. मात्र तीन ते सहा ऑगस्ट दरम्यान मुसळधार पावसाचा पडेल अंदाज आहे.

आतापर्यंत ५७ टक्‍केच पाऊस

जूनच्या शेवटच्या आठवड्यापासून ते दहा जुलैपर्यंत पावसाने ओढ दिली होती. नंतर कमी अधिक प्रमाणात पाऊस सुरू आहे. जिल्हयात आतापर्यंत ५७ टक्के पाऊस झाल्याचे महसूल विभाग सांगते. रोज आकाशात पावसाचे ढग गर्दी करतात, मात्र पाऊस पडत नाही. काही वेळातच आकाश स्वच्छ होते. याचा अर्थ पावसाच्या ढगांना गारहवा मिळत नाही. ती मिळण्यासाठी झाडांची गर्दी असणे आवश्‍यक आहे.