जळगाव : सकाळपासून बाहेर गेलेली मुलगी रात्री घरी उशिराने आली. मुलीच्या चिंतेने वडिलांनी तिला जाब विचारत रागाच्या भरात तिच्यावर हात उगारला. याचा राग आल्याने रात्रीच कोणाला काही एक न सांगता घराबाहेर पडलेल्या मुलीने विहिरीत उडी मारत आत्महत्या केली. सदरची घटना जळगाव शहरापासून जवळ असलेल्या खेडी या गावात घडली आहे. या घटनेमुळे आई- वडिलांना धक्का बसला आहे. 

जळगाव तालुक्यातील खेडी गावातील प्रज्ञा रवींद्र शिंदे (वय १६) असे मृत मुलीचे नाव आहे. प्रज्ञाचे वडील रवींद्र शिंदे हे सेंट्रिंगचे काम करून कुटुंबाचा उदरनिर्वाह करतात. दरम्यान १८ जूनला सकाळी प्रज्ञा हि घरात कोणालाही काही न सांगता घरातून बाहेर गेली होती. दिवसभर घरी न आलेली प्रज्ञा रात्री आठला घरी परतली. चिंतेत असलेल्या आई- वडिलांनी मुलगी घरी आल्यानंतर सुटकेच्या निश्वास सोडला. तर घरी उशिराने आलेल्या मुलीला वडिलांनी जाब विचारला. 

वडील रागावल्याने पुन्हा घरातून निघून गेली 

वडिलांनी तिला उशिरा येण्याबद्दल जाब विचारत वडिलकीच्या नात्याने तिच्यावर हात उगारला. मात्र याचा मुलीला राग आला. आपल्यावर अविश्वास दाखविल्याच्या विचारातून रागाच्या भरात प्रज्ञा पुन्हा घरातून कुणालाही काही न सांगता निघून गेली. यानंतर तिने घरापासून काही अंतरावर असलेल्या जुन्या विहिरीत उडी घेऊन आत्महत्या केली. इकडे तिच्या आई- वडिलांनी शोध घेतला असता ती सापडून आली नाही. 

आई- वडिलांचा आक्रोश 

तर दुसऱ्या दिवशी दुपारी बाराच्या सुमारास प्रज्ञाचा मृतदेह विहिरीत तरंगताना काही जणांना दिसून आला. याबाबत तिच्या आई- वडिलांना देखील माहिती देण्यात आली. यानंतर त्यांनी घटनास्थळी धाव घेत एकच आक्रोश केला. तर काही नागरिकांच्या मदतीने मृतदेह विहिरीतून बाहेर काढण्यात आला. याबाबत पोलिसांना माहिती देण्यात आली असता शनिपेठ पोलिस ठाण्यात आकस्मिक मृत्यूची नोंद झाली.