जळगाव : लोहारा येथील शेतकरी विश्वासराव पाटील यांना वाचनाची आवड. या आवडीच्‍या छंदातून विश्वासराव पाटील यांनी मागील ६५ वर्षात शेती सांभाळत अडीच हजार पुस्तकांचे वाचन केले. एवढेच नव्हे, तर विविध साहित्यिकांनी लिहिलेल्या तीन हजार पुस्तकांचा (Book) संग्रह करत त्‍याची लायब्ररी केली आहे. (jalgaon news farming he read two and a half thousand books and created a library)

जळगाव जिल्ह्यातील पाचोरा (Pachora) तालुक्यातील लोहारा गावातील कृषीभूषण शेतकरी विश्वासराव पाटील यांच्याकडे वडिलोपार्जीत पन्नास एकर शेती आहे. ही शेती करीत असतानाच विश्वासराव पाटील यांचा शालेय जीवनापासूनच कवीवर्य ना. धों. महानोर आणि भवरलाल जैन यांच्याशी संपर्क आला. कवी महानोर आणि भवरलाल जैन यांची वाचनाची आवड पाहता त्यांच्या संपर्कातून विश्वासराव यांनाही वाचनाची आवड लागली. याच वाचनाच्या छंदापोटी त्‍यांनी राज्यातील सर्वच नामांकित साहित्यिकांसह विविध संतांची लिखाण वाचन केली आहे. आज ८० वर्षाच्या उंबरठ्यावर असतानाही विश्वास पाटील यांची वाचनाची गोडी कमी झालेली नसून उलट त्यात वाढच झाली असल्याचे पाहायला मिळाले आहे.

पुस्‍तकातील ज्ञान शेतीत उतरविले

शेती करीत असताना शेती विषयी पुस्तक वाचन केल्याचा फायदा आपल्याला शेतीत झाला असून पुस्तकातून मिळालेले ज्ञान शेतीसाठी वापरले. यामुळेच (Farmer) कृषीभूषणसह विविध सन्मान मिळविले आहेत. याचे संपूर्ण श्रेय आपल्या वाचनाला जात असल्याचे विश्वास पाटील यांनी म्हटले आहे. तीस वर्षापूर्वी ‘पाषाणातून पाझर’ हे पुस्तक वाचनात आले. तर महानोर यांचे ‘शेती आणि पाणी’ हे पुस्तक वाचनात आले. आणि शेतीसह आपले संपूर्ण जीवनच यामुळे बदलून गेले. आपण ज्ञानाने, मनाने, विचाराने श्रीमंत आणि समृध्द झालो असल्याचं आपल्याला वाटू लागले असल्याचं ही विश्वासराव पाटील मोठ्या आत्मविश्वासाने सांगतात

अन्‌ पाण्याची समस्या सोडविण्यासाठी पुढाकार

पुस्तके वाचन करीत असताना त्यांचं केवळ वाचनच केले असे नाही तर त्यातील आशय आत्मसात करण्याचा नेहमीच प्रयत्न केला आहे. पाषाणातून पाझर हे पुस्तक वाचल्यानंतर आपल्या परिसरातील पाण्याची समस्या सोडविण्यासाठी पुढाकार घेऊन गावालगत असलेल्या नाल्यावर अनेक बंधारे घालून गावात पाणी निर्माण करण्याचा यशस्वी प्रयोग करू शकलो. वाचनातून ही कल्पना आणि समृद्धी मिळाले आहे.