जळगाव : चाळीसगाव तालुक्यातील अनेक गावांमध्ये रात्री झालेल्या पावसामुळे गावामध्ये पूर सदृश्य परिस्थिती होती. यामुळे जनजीवन विस्कळीत झाले. पाऊस आला मोठा अन्‌ घर गेले वाहून..असे काहीसे चित्र पाहण्यास मिळत आहे. उभा केलेला संसार पाण्यात बुडाला. आता पूर ओसरत असला तरी पुन्‍हा घर उभारताना डोळ्यात येणारे पाणी थांबत नसल्‍याचे पाहण्यास मिळत आहे. (jalgaon-news-chalisgaon-heavy-rain-villages-people-loss-house)

चाळीसगाव तालुका व परिसरात मध्‍यरात्रीनंतर ढगफुटी सदृश्‍य पाऊस झाल्‍याने गाव पाण्यात बुडाली. पशु, पक्षी पुरात वाहून गेले. सकाळपासूनच गावात बचावासाठी प्रयत्‍न सुरू झाले. दुपारनंतर पाऊस थांबल्‍याने पुराचे पाणी देखील ओसरू लागले आहे. यामुळे घरांमध्ये शिरलेले पाणी काही प्रमाणात कमी होत आहे. परंतु, नंतरचे चित्र पाहून घर सावरताना डोळ्यातील अश्रू वाहू लागले आहेत.

उपाशी पण भुकही लागली नाही

घरची परिस्थिती पाहून नागरिकांना रडू कोसळत आहे. जनावरे, कोंबड्या अनेक पशुपक्ष्यांचा यामध्ये बळी गेला आहे. अचानक आलेल्‍या पुरामुळे गावांमधील नागरीक आज सकाळपासून उपाशी पोटी आहेत. मात्र भुकेची जाणीव देखील झाली नाही. घरामध्ये सात ते आठ फुटापर्यंत पुराचे पाणी शिरल्‍याने घरात असलेले अन्नधान्य पुरामुळे वाहून गेले आहे. पाण्यात राहून तहान भागविणे पण शक्‍य नव्‍हते.

यंत्रणा पोहचली पण सुविधा नाही

प्रशासकीय अधिकारी जरी गावाला भेट देऊन गेले असले तरी अद्यापपर्यंत कोणतीही सुविधा या ठिकाणी उपलब्ध झालेली नाही. रात्रीपासून गेलेले विद्युत लाईट आत्तापर्यंत सुद्धा सुरळीत झालेली नाही. यामुळे नागरिकांचे हाल होत आहेत. पुराचे पाणी जरी असले तरी नागरिकांना आता अनेक साथीच्या आजारांना तोंड द्यावे लागणार आहे.