जळगाव : मध्यप्रदेशातील खरगोन आणि धार जिल्ह्याच्या लगत नर्मदा नदीत बस कोसळून १३ प्रवाशांचा मृत्‍यू झाला आहे. या अपघातातील (Accident) मृतांची ओळख पटली असून मृतांमध्‍ये अमळनेर तालुक्‍यातील पती– पत्‍नीसह चालक व वाहकाचा समावेश आहे. (Indore Amalner Bus Accident)

जळगाव (Jalgaon) विभागातील अमळनेर डेपोची (Amalner) अमळनेर ते इंदूर बस सकाळी साडेसातला इंदूर येथून परतीच्‍या मार्गाला लागली असताना खरगोन आणि धार या दोन जिल्ह्यांच्या सीमेवर असणार्‍या खलघाट गावाजवळ नर्मदा नदीच्या पात्रात बस कोसळली. यात सुमारे ४० प्रवासी होते. यात १३ प्रवाशांचा मृत्‍यू झाला आहे.

बसमधील मृत प्रवाशी

बस वाहक प्रकाश श्रवण चौधरी (वय 40, रा. शारदा कॉलनी अमळनेर), चालक– चंद्रकांत पिता एकनाथ पाटील (वय ४५, अमळनेर), चेतन राम गोपाल (जांगिड़, नांगल कला गोविंदगढ़ जयपुर राजस्थान), जगन्नाथ हेमराज जोशी (वय 70, रा. मल्हारगढ़ उदयपुर राजस्थान), निंबाजी आनंदा पाटील (वय 60, पिळोदा अमळनेर), कमलाबाई नीबाजी पाटिल (वय 55, पिळोदा अमळनेर) या मृतांची ओळख आधारकार्डमुळे पटली आहे. तसेच अरवा मुर्तजा बोरा (वय २७, रा. मूर्तिजापुर, अकोला), सैफुद्दीन अब्बास निवासी (नूरानीनगर, इंदौर) यांची ओळख नातेवाईकांमुळे पटली आहे.