जळगाव : शहरातील निवृत्ती नगर येथील १४ वर्षीय मुलाने राहत्या घरी गळफास घेऊन आत्महत्या करण्याचा प्रयत्न केला. खासगी रुग्णालयात उपचार सुरू असताना ४ नोव्हेंबरला त्याचा मृत्यू झाला. याप्रकरणी जिल्हापेठ पोलीस स्टेशनला अकस्मात मृत्यूची नोंद करण्यात आली आहे.

जळगाव शहरातील निवृत्तीनगरतील रहिवासी वेदांत पंकज नाले (वय १४) असे मृत झालेल्या मुलाचे नाव आहे. वेदांत हा आठवीच्या वर्गात शिकत होता. दरम्यान दिवाळीच्या दुसऱ्याची दिवशी म्हणजे पाडव्याच्या दिवशी (२ नोव्हेंबर) वेदांत याने रात्री साडेनऊ वाजेच्या सुमारास राहत्या घरामध्ये स्कार्पने गळफास घेतला. त्याच्या आईला मुलगा गळफास घेतलेल्या अवस्थेत दिसला. यानंतर त्याला तात्काळ शेजाऱ्यांच्या मदतीने रुग्णालयात दाखल करण्यात आले. 

खासगी रुग्णालयात उपचार सुरु असताना सोमवारी (४ नोव्हेंबर) दुपारी वेदांतची प्राणज्योत मालवली. वेदांतने टोकाचे पाऊल कोणत्या कारणाने उचलले याचे कारण अद्याप समोर आलेले नाही. वेदांतचा मृत्यू झाल्याने कुटुंबीयांनी एकच आक्रोश केला. जिल्हापेठ पोलीस स्टेशनला अकस्मात मृत्यूची नोंद करण्यात आली आहे.