जळगाव महापालिकेच्या निवडणुकीसाठी माघारीची प्रक्रिया सुरू झालीय. अर्ज छाननी प्रक्रियेदरम्यान प्रतिस्पर्धी उमेदवाराचा अर्ज बाद झाल्यानंतर भाजपच्या उज्ज्वला बेंडाळे या बिनविरोध विजयी झाल्या. भाजपनंतर आता शिवसेनेनेही खातं उघडलंय. शिंदेसेनेचे आमदार प्राध्यापक चंद्रकांत सोनवणे यांचे पुत्र गौरव सोनवणे हे बिनविरोध विजयी झालेत.

दरम्यान त्यांच्या विजयाची अधिकृत घोषणा अर्ज माघारी घेण्याचा कालावधी संपल्यानंतर होणार आहे. भाजपच्या माजी महानगराध्यक्षा उज्ज्वला मोहन बेंडाळे यांच्या विरोधात एकही अर्ज नसल्याने त्यांची बिनविरोध निवड झाली होती. त्यामुळे भाजपने महापालिकेत खाते उघडले होते. आता प्रभाग १८ अ मधून शिंदेसेनेनेही महापालिकेत धमाकेदार एंट्री केलीय.

प्रभाग क्रमांक १८-अ मधून गौरव चंद्रकांत सोनवणे यांना शिंदेसेनेनेकडून उमेदवारी देण्यात आली होती. त्यांच्या विरोधात ठाकरे गटाकडून मयूर चंद्रशेखर सोनवणे यांनी उमेदवारी अर्ज दाखल केला होता. मात्र ऐनवेळी माघार घेतलं. शिवसेनेच्या विजयानंतर शिंदे सेनेचे आमदार आणि मंत्री गुलाबराव पाटील यांनी गौरव सोनवणे यांचं अभिनंदन केलं. त्यावेळी त्यांनी ठाकरे गटाच्या उमेदवाराला टोमणा मारला.

शिवसेनेचा एक उमेदवार बिनविरोध झाला आहे तर काल भाजपचा एक उमेदवार बिनविरोध झाला होता. ठाकरे गटाच्या उमेदवाराने का माघार घेतली माहित नाही, पण कदाचित विकासाला पाहून त्यांनी माघार घेतली असावी. सध्या जास्तीत जास्त उमेदवार बिनविरोध करण्याचे मिशन असून संध्याकाळपर्यंत आणखी चार उमेदवार बिनविरोध होतील, असा विश्वास मंत्री गुलाबराव पाटील यांनी व्यक्त केलाय. जळगाव महापालिकेत महायुती बहुमताचा आकडा पार करेल, असा विश्वास देखील मंत्री गुलाबराव पाटील यांनी व्यक्त केला आहे.