मुक्ताईनगर (जळगाव) : महायुतीचे उमेदवार चंद्रकांत पाटील यांनी धनुष्यबाण चिन्हावर मुक्ताईनगर विधानसभा मतदारसंघातून उमेदवारी अर्ज दाखल केला आहे. मोठ्या मताधिक्याने विजयी होणार; असा विश्वास चंद्रकांत पाटील यांनी यावेळी व्यक्त केला. तसेच एबी फॉर्म अद्याप न मिळाल्यावरून रोहिणी खडसे यांच्यावर देखील त्यांनी निशाणा साधला आहे.   

मुक्ताईनगर (Muktainagar) विधानसभा मतदारसंघातून महायुतीचे उमेदवार म्हणून विद्यमान आमदार चंद्रकांत पाटील यांनी आज गुरुपुष्य योग मुहूर्तावर उमेदवारी अर्ज दाखल केला आहे. मोजक्या कार्यकर्त्यांसोबत मुक्ताईनगर तहसील कार्यालयात जाऊन आमदार चंद्रकांत पाटील (Chandrakant Patil) यांनी उमेदवारी अर्ज दाखल केला आहे. सकाळी कुलदेवतेचा आशीर्वाद घेवून परिवाराने औक्षण करत उमेदवारी अर्ज दाखल करण्यासाठी रवाना झाले. 

मोठ्या मताधिक्याने निवडून येईल

महायुतीचा उमेदवार म्हणून एकनाथ शिंदे यांनी माझ्यावर जो विश्वास टाकला आहे, तो नक्कीच सार्थ ठरवून मोठ्या मताधिक्याने मुक्ताईनगर विधानसभा मतदारसंघातून निवडून येईल. गेल्या पाच वर्षांमध्ये केलेले विकास कामे आणि जनतेचे प्रेम यावर मी भरघोस मताधिक्याने निवडून येईल; असा आत्मविश्वास देखील त्यांनी व्यक्त केला. तसेच माझ्या विरोधकांना अजूनपर्यंत एबी फॉर्म मिळाला नाही, असा टोला देखील मुक्ताईनगरचे आमदार चंद्रकांत पाटील यांनी रोहिणी खडसे यांना यावेळी बोलताना लावला आहे.