अमळनेर (जळगाव) : सुटीत मामाच्या गावाला आले असता गावी जाण्यासाठी बसच्या प्रतीक्षेत उभ्या असलेल्या दोन मुलींना भरधाव वेगाने येणाऱ्या कारने जोरदार धडक दिली. यात एका मुलीचा मृत्यू झाल्याची घटना लोण फाट्यावर घडली आहे. या प्रकरणी मारवाड पोलीस स्टेशनला गुन्हा दाखल करण्यात आला आहे.

अमळनेर (Amalner News) तालुक्यातील लोण बु. येथे मामाकडे आलेल्या तमन्ना सिद्धार्थ भालेराव (वय ११) व अर्चना सिद्धार्थ भालेराव (वय ७) ह्या गावी चावलखेडा (ता. धरणगाव) येथे जाण्यासाठी आई, बहीण व मामासह १७ नोव्हेंबरला दुपारी साडेतीन वाजेच्या दरम्यान लोण फाट्यावर बसची वाट पाहत उभे होते. याचवेळी अमळनेरकडून भरधाव वेगाने आलेल्या कारने अर्चना व तमन्ना या दोघांना धडक (Accident) दिली. यानंतर कार अनियंत्रित होऊन शेताच्या बांधावरून पलटी झाली.

दरम्यान कारने धडक दिल्यानंतर अर्चना व तमन्ना यांना उचलले असता तमन्ना हि गंभीर जखमी झाली होती. तर अर्चना हीचा पाय मोडला होता. तसेच कार पलटी झाल्याने कारचालक देखील जखमी झाला होता. दोन्ही बहिणींसह चालकाला अमळनेर ग्रामीण रुग्णालयात नेण्यात आले. डॉक्टरांनी तपासणी केली असता तमन्ना हिचा मृत्यू झाला होता. तर अर्चनावर सध्या उपचार सुरु आहे. याप्रकरणी लोण बु. येथील अनिल खैरनार यांनी दिलेल्या फिर्यादीनुसार मारवड पोलिसांत गुन्ह्याची नोंद करण्यात आली असून पुढील तपास हेकॉ भरत ईशी हे करीत आहेत.