जळगाव : गिरणा नदी पुलाजवळ असलेल्‍या जकात नाक्याजवळ दोन दुचाकींची समोरासमोर धडक होवून अपघात (Accident News) झाला. या धडकेत दुचाकीस्वार महामार्गावर फेकला गेला. याचवेळी आलेली कार अंगावरून गेल्‍याने त्याचा (Jalgaon News) जागीच मृत्यू झाला. तर एक जण गंभीर जखमी झाला आहे. सदर घटना मंगळवारी रात्री साडेसातच्या सुमारास घडली. (Letest Marathi News)

बांभोरी येथील दिपक सुरेश नन्नवरे (वय २०) हा आई– वडील आणि भावांसोबत वास्तव्यास होता. मोलमजूरी करुन कुटुंबाला हातभार लावत होता. दरम्‍यान मंगळवारी (७ फेब्रुवारी) सांयकाळी दिपक नन्नवरे हा मित्र ललित गोकूळ पाटील (रा. बांभोरी) याच्यासोबत जळगावकडून बांभोरीला दुचाकीने जात होता. सायंकाळी साडेसात वाजेच्या सुमारास बांभोरी पुलाजवळील जकात नाक्यासमोरून राष्ट्रीय महामार्गावरून जात असताना समोरून येणाऱ्या दुचाकीने त्यांच्या दुचाकीला जोरदार धडक दिली.

महामार्गावर मधोमध पडल्‍याने घात

दुचाकीच्‍या समोरासमोर झालेल्‍या धडकेत दिपक हा महामार्गावर मध्यभागी पडला. त्याचवेळी बांभोरीकडून जळगावकडे जाणारी भरधाव कार दिपकच्‍या अंगावरून गेली. यात त्याचा जागीच मृत्यू झाला. तर सोबत असलेला ललित पाटील हा गंभीर जखमी झाला. अपघात झाल्यानंतर बांभोरी गावातील ग्रामस्थांनी व मित्र परिवारने घटनास्थळी धाव घेतली. जखमी झालेल्या ललितला तातडीने शासकीय वैद्यकीय महाविद्यालयात उपचारार्थ दाखल करण्यात आले आहे. या प्रकरणी जळगाव तालुका पोलीस ठाण्यात अकस्मिक मृत्यूची नोंद करण्यात आली आहे.