सचिन बनसोडे

Maratha Reservation:

संपूर्ण महाराष्ट्रात मराठा आरक्षणाचा मुद्दा चांगलाच पेटला आहे. मराठा समाजाला आरक्षण मिळावे यासाठी राजकीय नेत्यांसह विविध क्षेत्रातील व्यक्ती त्यांना पाठिंबा देतायत. अशात कीर्तनकार इंदुरीकर महाराजांनी देखील मराठा आरक्षणासाठी पाठिंबा दिला आहे. ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

मराठा आरक्षणाच्या मागणीसाठी मनोज जरांगे पाटील यांना पाठींबा देत उद्यापासून पुढचे ५ दिवस इंदुरीकर महाराजांचे सर्व कार्यक्रम रद्द झालेत. मराठा समाजाच्या आरक्षणासाठी इंदुरीकर महाराज जरांगेंच्या पाठीशी उभे आहेत. त्यामुळे उद्यापासून पुढचे ५ दिवस एकही कार्यक्रम व कीर्तन न करण्याचा निर्णय त्यांनी घेतला आहे, अशी माहिती विश्वसनीय सूत्रांनी दिलीये.

मराठा आरक्षणासाठी मुंबईत सह्याद्री अतिथीगृहावर मुख्यमंत्री एकनाथ शिंदे यांच्या अध्यक्षतेखाली आज मराठा आरक्षण उपसमितीची महत्वाची बैठक सुरू झाली आहे. या बैठकीत आरक्षणाबाबत ठोस निर्णय होण्याची शक्यता व्यक्त करण्यात येत आहे. बैठकीनंतर मुख्यमंत्री मनोज जरांगे पाटील यांची भेट घेण्यासाठी रवाना होणार असल्याची माहिती मिळालीये.

जरांगे पाटलांनी मराठा समाजाच्या आरक्षणासाठी आर या पार अशी लढाई सुरू केलीये. आमरण उपोषणाचा त्यांचा आजचा ६ वा दिवस आहे. जरांगे यांनी अन्न-पाण्याचा त्याग केल्याने त्यांची प्रकृती आणखीन खालावत चालली आहे. वैद्यकीय उपचार घेण्यासही त्यांनी नकार दिलाय.

जरांगे पाटलांच्या या लढ्यात मराठा तरुणांसाह महिलांनी देखील उपोषणाला सुरुवात केलीये. गावागावात महिला साखळी उपोषण करत आहेत. यासह सोलापुरमधून विष्णू पवार हे ८५ वर्षांचे आजोबा देखील आमरण उपोषणाला बसलेत.