गेले दोन दिवस इंडिगो विमान कंपनीला पायलटच्या कमतरतेचा सामना करावा लागत आहे. नागपूरच्या डॉ. बाबासाहेब आंबेडकर आंतरराष्ट्रीय विमानतळावरून गेल्या दोन दिवसांत अनेक उड्डाणे रद्द करण्यात आली आहेत. याचा फटका परदेशात जाणाऱ्या बऱ्याच पर्यटकांना बसला आहे. काहींचं लगेज मिळालं नाही, काहींचा लग्न सोहळ्याचा मुहूर्त हुकला; तर काहींना पुण्याला जायचं होत त्यांना हैद्राबादला सोडलं असल्याची संतप्त घटना घडली.

मिळालेल्या माहितीनुसार, नागपूर विमानतळ येथे अनेक प्रवासी वेळेवर विमान पकडण्यासाठी पोहचले. मात्र याठिकाणी आल्यावर विमान रद्द किंवा पुढे ढकलली असल्याचे सांगण्यात आल्याने प्रवाश्यांना मोठ्या मनस्ताप सहन करावा लागत आहे. आता पर्यंत देशातील ५५० इंडिगो विमानांचे उड्डाण रद्द करण्यात आले. काही प्रवासी बाहेरील देशातून भारतात आले. मात्र त्यांच लगेज अजूनही भारतात पोहचले नाही.

ऑस्ट्रेलियातून एक कुटुंब आले होते. त्यांना दिल्लीमध्ये लगेज मिळण्याऐवजी त्यांना नागपूरला जाणार सांगितलं. त्यानुसार ते नागपूरला आले. मात्र नागपूरला आल्यावर लगेज मात्र कुठे आहे, याची कुठलीही माहिती त्यांना देण्यात आली नाही. याचा मोठा फटका या कुटुंबाला बसला. आलेल्या अनुभवातून विमानतळावरील संतप्त झालेल्या एका तरुणाने म्हटले की, यानंतर इंडिगो मध्ये प्रवास करणार नाही.

तसेच काल रात्री ११ वाजून ४० मिनिटांना नागपूर ते पुणे अशी इंडिगोच्या फ्लाईटचे नियोजन होते. मात्र ती फ्लाईट एक वाजेपर्यंत नागपूर मधून रवाना झाली नाही. पहाटे एक नंतर उड्डाण घेतल्यानंतर अवघ्या अर्ध्या तासात आपल्या विमानाला पुण्यात लँड होण्याची परवानगी मिळत नाही, त्या ठिकाणी लँड होण्यासाठी जागा नाही, असं कारण सांगून इंडिगो crew आणि व्यवस्थापनाने फ्लाईट पुण्या ऐवजी हैदराबादला लँड केली. दरम्यान प्रवाशांना पुण्याऐवजी हैद्राबादला सोडल्याने संतप्त झालेल्या प्रवाशांनी विमानतळाच्या आतील भागात एकच गोंधळ घातला. संतप्त झालेल्या प्रवाशांनी यावर लवकरात लवकर उपाययोजना करण्याची मागणी केली.