महाराष्ट्रासाठी आनंदाची बातमी आहे. राज्याला लवकरच बारावी वंदे भारत एक्सप्रेस ट्रेनची भेट मिळणार असून, पंतप्रधान नरेंद्र मोदी १० ऑगस्ट २०२५ रोजी देशातील आधुनिक रेल्वे प्रवासाला नवा वेग देणार आहेत. ते केएसआर बेंगळूरू रेल्वे स्थानकावरून एकाच वेळी तीन वंदे भारत एक्सप्रेस गाड्यांना हिरवा झेंडा दाखवणार आहेत. यात अजनी (नागपूर)–पुणे वंदे भारत, केएसआर बेंगळूरू–बेळगावी वंदे भारत आणि श्री माता वैष्णोदेवी कटडा–अमृतसर वंदे भारत एक्सप्रेसचा समावेश आहे. या ऐतिहासिक सोहळ्यास केंद्रीय रेल्वे, माहिती व प्रसारण तसेच इलेक्ट्रॉनिक्स आणि माहिती तंत्रज्ञान मंत्री अश्विनी वैष्णव आणि इतर मान्यवर उपस्थित राहणार आहेत.

अजनी (नागपूर)-पुणे वंदे भारत एक्सप्रेस ही देशातील सर्वाधिक अंतर धावणारी वंदे भारत गाडी ठरणार आहे. ती एकूण ८८१ किलोमीटरचा प्रवास पूर्ण करेल आणि सरासरी वेग ताशी ७३ किलोमीटर असेल. या मार्गावर सध्या धावणाऱ्या गाड्यांमध्ये ती सर्वात वेगवान गाडी असेल. या गाडीत एकूण दहा थांबे असतील आणि ती वर्धा, अकोला, शेगाव, भुसावळ, जळगाव, मनमाड, पुणतांबा आणि दौंड मार्गे पुणेपर्यंत प्रवास करेल. गाडीला २६१०१/२६१०२ हा क्रमांक देण्यात आला असून, पुण्याहून नियमित सेवा ११ ऑगस्टपासून तर अजनीहून १२ ऑगस्टपासून सुरू होईल. आठवड्यातून सहा दिवस ही गाडी धावेल, तर एक दिवस देखभाल आणि तपासणीसाठी राखीव असेल. तसेच वर्धा–अकोला– शेगाव– भुसावळ– जळगाव– मनमाड आणि पुणतांबा ते दौंड दरम्यानच्या भागात धावणारी पहिली वंदे भारत ट्रेन ठरणार आहे.

या गाडीमुळे प्रवाशांना वेळेची मोठी बचत होणार असून, प्रवास अधिक आरामदायी आणि जलद होईल. व्यापारी, विद्यार्थी, नोकरी करणारे कर्मचारी, तसेच पर्यटक या सर्वांना याचा लाभ होणार आहे. तसेच नागपूर-पुणे मार्ग हा विदर्भ, मराठवाडा आणि पश्चिम महाराष्ट्राला जोडणारा महत्त्वाचा दुवा आहे. त्यामुळे या गाडीच्या सुरुवातीने केवळ प्रवाशांच्या सोयीसुविधाच वाढणार नाहीत, तर पर्यटन, व्यापार आणि वाणिज्यालाही चालना मिळेल. पुणे आणि नागपूर दोन्ही शहरांमध्ये मोठ्या प्रमाणावर विद्यार्थी वर्ग, आयटी क्षेत्रातील कर्मचारी, उत्पादन उद्योगातील व्यावसायिक तसेच शासकीय अधिकारी यांची सततची ये-जा असते. त्यांना जलद आणि विश्वासार्ह प्रवासाची ही नवी सोय मिळणार आहे.

या वंदे भारत एक्सप्रेसमध्ये अत्याधुनिक तंत्रज्ञानाचा वापर करण्यात आला असून ती अधिक सुरक्षित, कमी आवाजाची आणि पर्यावरणपूरक आहे. स्वयंचलित दरवाजे, रोटेशन सीट्स, वायफाय सुविधा, माहिती फलक, बायो-व्हॅक्यूम टॉयलेट्स आणि अत्याधुनिक ब्रेकिंग सिस्टम यांसारख्या सुविधा यात असतील. तसेच, या गाडीची एरोडायनॅमिक रचना तिचा वेग वाढविण्यास आणि इंधन कार्यक्षमतेस मदत करते. प्रवासादरम्यान प्रवाशांना उच्च प्रतीचे खाद्यपदार्थ आणि पेयसेवांची सोय देखील उपलब्ध होणार आहे.

भारतातील इतर मार्गांवर आधीच सुरू असलेल्या वंदे भारत गाड्यांना प्रवाशांकडून उत्स्फूर्त प्रतिसाद मिळत आहे. महाराष्ट्रातील ही नवी गाडी त्या यशस्वी परंपरेला पुढे नेईल, अशी अपेक्षा आहे. रेल्वे प्रशासनाचा दावा आहे की, या गाडीच्या सुरूवातीने नागपूर-पुणे प्रवासाच्या वेळेत तब्बल २ ते ३ तासांची बचत होईल, जे दैनंदिन प्रवास करणाऱ्यांसाठी मोठा दिलासा आहे.

नव्या वंदे भारत एक्सप्रेसचा उद्घाटन सोहळा भव्य स्वरूपात पार पडणार असून या सोहळ्याला रेल्वे मंत्री, मध्य रेल्वेचे वरिष्ठ अधिकारी, तसेच नागपूर आणि पुणेतील लोकप्रतिनिधी उपस्थित राहतील. उद्घाटनाच्या दिवशी गाडीला विशेष सजावट करण्यात येणार आहे आणि प्रवाशांसाठी स्वागत सोहळ्याचे आयोजन होणार आहे. या नव्या रेल्वेसेवेच्या सुरुवातीने महाराष्ट्राच्या रेल्वे विकासाला नवे बळ मिळणार असून राज्याच्या आर्थिक, शैक्षणिक आणि पर्यटन क्षेत्राला नव्या संधी उपलब्ध होतील.

महाराष्ट्रात धावणाऱ्या वंदे भारत गाड्यांची यादी

• नागपूर-सिकंदराबाद

• हुबळी-पुणे

• कोल्हापुर–पुणे

• जालना–छत्रपति शिवाजी महाराज टर्मिनस

• बिलासपूर-नागपूर

• मुंबई सेंट्रल-गांधीनगर

• इंदूर-नागपूर

• सीएसएमटी-साईनगर शिर्डी

• सीएसएमटी-सोलापूर

• सीएसएमटी-मडगाव

• मुंबई सेंट्रल-अहमदाबाद

• अजनी (नागपूर)-पुणे (नवीन सेवा)