- अमाेल कलये, विनायक वंजारे

रत्नागिरी/सिंधुदुर्ग : गेल्या काही दिवसांपासून दडी मारलेल्या पावसाने (Rain) दाेन दिवस राज्यभरात दमदार हजेरी लावली आहे. पश्चिम महाराष्ट्रात देखील सतत पावसाची संततधार सुरु आहे. दरम्यान हवामान विभागानं मुंबई, पुणेसह रत्नागिरी जिल्ह्यांना पुढील ४८ तास रेड अलर्टचा (Red Alert) इशारा दिला आहे. यामुळे प्रशासनाने नदी काठच्या गावांना सतर्कतेचा इशारा दिला आहे. (Rain Update)

रत्नागिरी जिल्ह्यात मुसळधार पाऊस पडत आहे. या पावसाचा फटका जिल्ह्यातील शेती परिसर आणि सखल भागातील अनेक ठिकाणांना बसला आहे. गेल्या 24 तासांत जिल्ह्यात (182 मिली मीटर) दमदार पाऊस झाला आहे. संगमेश्वर, रत्नागिरी, लांजा, राजापूर, गुहागर या तालुक्यांमध्ये शंभर मिमी पेक्षा जास्त पावसाची नोंद झाली आहे. जिल्ह्यातील सर्व तालुक्यांमध्ये गेल्या चाेवीस तासात अतिवृष्टीची नोंद झाली आहे.

याबराेबरच रघुवीर घाटामध्ये दरड कोसळली. त्यामुळे वाहतूक पूर्णपणे बंद झाली. पावसाळी वातावरणामुळे दरड हटवण्यास वेळ लागण्याची शक्यता आहे असे प्रशासनाने कळविले आहे. तसेच काजळी नदीने धाेक्याची पातळी ओलांडली आहे.

करूळ घाटात दरड काेसळली

सिंधुदुर्ग जिल्ह्यात सलग दोन ते तीन दिवस कोसळणाऱ्या पावसाचा फटका करूळ घाटाला बसला. या घाटातील संरक्षक भिंत कोसळून घाटमार्ग बंद झाला आहे. गेल्या चाेवीस तासात वैभववाडीत (127 मिली मीटर) पाऊस पडला. या पावसाचा फटका तळकोकणाला पश्चिम महाराष्ट्राशी जोडणाऱ्या महत्वाच्या करूळ घाटाला बसला. रात्री दहाच्या सुमारास घाटातील संरक्षक भिंत कोसळून रस्ता खचला. कोणताही अनुचित प्रकार घडू नये म्हणून या मार्गाने जाणारी वाहतूक बंद करण्यात आली आहे. फोंडाघाट व आंबोली मार्गे या मार्गावरची वाहतूक सध्या वळविण्यात आली आहे.