राज्यावरचं मोंथाच संकट टळल्याने पावसाचा जोरही कमी झाला आहे. आज सकाळपासून मुंबई आणि उपनगरात ढगाळ वातावरण असून काही भागात पावसाच्या रिमझिम सरी कोसळल्या. तसेच आज दक्षिण कोकण, मध्य महाराष्ट्र, मराठवाड्यात तुरळक ठिकाणी विजांसह पावसाची शक्यता आहे. उर्वरित राज्यात ढगाळ हवामानासह कमाल आणि किमान तापमानात चढ उतार होण्याची शक्यता हवामान विभागाने वर्तविली आहे. पावसाचा जोर ओसरला असला तरी येत्या ५ नोव्हेंबर पर्यंत पडणार असल्याचे हवामान खात्याने सांगितले आहे.

समुद्रात गेले एक आठवडा धुमाकूळ घालणार मोंथा चक्रीवादळ काही प्रमाणात शांत झाल्याचं पाहायला मिळत आहे. तसेच दोन्ही समुद्रातील कमी दाब क्षेत्रांचा प्रभाव कमी झाल्याने राज्यात पावसाचा जोर कमी होणार आहे. काल सकाळपर्यंतच्या २४ तासांमध्ये कोकण, मध्य महाराष्ट्र आणि विदर्भात पावसाच्या मध्यम ते जोरदार सरींनी हजेरी लावली. धुळे येथे आणि नाशिक जिल्ह्यातील मुल्हेर येथे सर्वाधिक ५० मिलिमीटर पावसाची नोंद झाली. पावसाच्या हजेरीने राज्याच्या कमाल तापमानात हळूहळू घट होऊ लागली आहे.‎

राज्यात बहुतांश ठिकाणी कमाल तापमानाचा पारा ३० अंशाच्या खाली आला आहे. राज्याच्या किमान तापमानातही हळूहळू घट होत असून, पहाटे थंड वारे अनुभवायला मिळत आहेत. सोलापूर येथे ३२.६ अंश सेल्सिअस कमाल तापमानाची, महाबळेश्वर येथे १४.४ अंश सेल्सिअस किमान तापमानाची नोंद झाली.

आज मुंबई आणि उपनगरासह कोकणातील रत्नागिरी, सिंधुदुर्ग, मध्य महाराष्ट्रातील नंदूरबार, धुळे, जळगाव, नाशिक, अहिल्यानगर, पुणे, सातारा, कोल्हापूर, मराठवाड्यातील छत्रपती संभाजीनगर, जालना, बीड, परभणी, लातूर, नांदेड या जिल्ह्यांत विजांसह पावसाचा अंदाज वर्तवण्यात आला आहे. उर्वरित राज्यात ढगाळ हवामानासह ऊन पावसाचा लपंडाव कायम राहण्याची शक्यता हवामान विभागाने वर्तविली आहे.