उत्तरेकडून वाहणाऱ्या थंड वाऱ्यांचा प्रवाह कमी झाल्याने राज्यात थंडीची लाट ओसरली आहे. ऐन हिवाळ्यात राज्यात पावसाला पोषक हवामान होत असून, कोकण आणि दक्षिण मध्य महाराष्ट्रात आकाश ढगाळ होत आहे. आज कोकण, मध्य महाराष्ट्रात तुरळक ठिकाणी विजांसह हलक्या पावसाची, तसेच गारठा कमी होण्याचा अंदाज हवामान विभागाने वर्तवला आहे.

काल २२ नोव्हेंबर रोजी धुळे येथील कृषी महाविद्यालयात राज्याचे नीचांकी ८.५ अंश तापमान नोंदले गेले. जळगाव आणि परभणी येथील मराठवाडा कृषी विद्यापीठात पारा ११ अंशांच्या खाली असल्याने गारठा कायम होता. उर्वरित राज्यात थंडी कमी झाली आहे. दुपारच्या वेळी उन्हाचा चटका वाढला असून, उकाडा जाणवू लागला आहे.

अनेक ठिकाणी तापमानाचा पारा तिशीपार आहे. शनिवारी सकाळपर्यंतच्या २४ तासांमध्ये कोकणातील डहाणू येथे ३५.३ अंश सेल्सिअस कमाल तापमानाची नोंद झाली.उत्तरेकडून येणार शीत वारे मंदावले असल्याने राज्यातील थंडीचे प्रमाण कमी झाली आहे. राज्यावर थंडीची गुलाबी चादर पसरलेली असताना वातावरणात पावसाला पोषक वातावरण निर्माण झाले आहे.

त्यामुळे येत्या काही दिवसांमध्ये कोकण, मध्य महाराष्ट्रात तुरळक काही ठिकाणी पावसाच्या कोसळधारा पाहायला मिळणार आहेत. वातावरणात होणाऱ्या बदलांमुळे आजारांना आमंत्रण मिळत आहे. सर्दी, खोकल्यासारख्या आजारांनी मान वर काढली आहे.