Akola Marathi News: राज्यात गेल्या काही दिवसांत गुन्हेगारीच्या घटनांमध्ये मोठी वाढ झाल्याचे पाहायला मिळत आहे. अनैतिक संबंध, कौटुंबिक कलह, महिलांवरील अत्याचार, आर्थिक फसवणूक यातून हत्या आणि आत्महत्येच्या घटना सातत्याने समोर येत आहेत. त्यातच आता अकोल्यातून आणखी एक संतापजनक बातमी समोर आली आहे. या घटनेने मोठी खळबळ उडाली आहे. (Latest Marathi News)

पत्नी दिसायला सुंदर नाही, तिला कामधंदा येत नाही असे म्हणत पती दारू पिऊन पत्नीचा सतत शारीरिक व मानसिक छळ करत असल्याचा प्रकार अकोल्यात उघडकीस आला आहे. पतीच्या याच छळाला कंटाळून पत्नीने अकोल्यातील मूर्तिजापूर शहर पोलिसांकडे तक्रार दिली.

त्यानुसार पोलिसांनी (Police) पतीविरुद्ध गुन्हा दाखल केला आहे. विवाहितेने दिलेल्या तक्रारीनुसार तिला दोन मुले असून, तिचे लग्न (Marriage) २०१३ मध्ये येळाबारा, ता. वडगाव, जि. यवतमाळ येथील श्यामसुंदर दयाल प्रजापती याच्यासोबत झाले.

लग्नानंतर काही महिने सुखात गेल्यानंतर पती दररोज घरी दारू पिऊन यायचा. शिवीगाळ करून मारहाण करायचा आणि तू दिसायला सुंदर नाही. तुला कामधंदा येत नाही, असे म्हणत, छळ करायचा. (Maharashtra News)

मुले असल्याने, विवाहिता त्याचा छळ सहन करायची. पती सतत चारित्र्यावर संशय घेतो आणि माहेराहून दोन लाख रुपये आणण्याचा तगादा लावतो. दुचाकी मागितली असता, विवाहितेच्या वडिलांनी त्याला नवीन दुचाकी घेऊन दिली. त्यानंतरही पती सतत वाद घालून छळ करत होता. वर्षभरापूर्वी पती श्यामसुंदर प्रजापती याने विवाहितेला घरातून हाकलून दिले होते. या प्रकरणात मूर्तिजापूर शहर पोलिसांनी पतीविरुद्ध गुन्हा दाखल केला असून पुढील तपास सुरू आहे.