रत्नागिरी: रत्नागिरी कोकण किनारपट्टीवर मान्सूनची चाहूल देणाऱ्या बदलांना सुरुवात झाली आहे. यामुळे मान्सून सक्रीय होण्याच्या दृष्टीने महाराष्ट्रासाठी ही आनंदाची बातमी आहे. समुद्राच्या लाटांमधून किनारपट्टीवर मातीच्या रंगाची फेणी म्हणजे फेस येण्यास सुरुवात झाली आहे. त्यामुळे आता मान्सून सक्रिय होण्यासासाठी काही दिवस बाकी आहेत. यामुळे आता लवकरच सर्वांना पाऊस अनुभवयाला मिळणार आहे.

मान्सून कधी येणार यांचे मच्छिमार ठोकताळे बांधत असतात. मान्सून सक्रिय होण्याच्या काही दिवस समुद्र किनारी फेणीचे पाणी दिसते. त्यानुसार, आता समुद्राच्या लाटांमधून किनारपट्टीवर फेणी दिसू लागली आहे. तसेच दक्षिणेच्या दिशेने नैऋत्य मोसमी वेगवान वारे वाहण्यास सुरुवात झाली आहे. मान्सून अंदमानात दाखल झाल्याची हवामान खात्याची माहिती हाती आली आहे. त्यामुळे समुद्रात सुरु झालेल्या बदलानुसार ४ ते ७ जून दरम्यानं मान्सून कोकणात येण्याचा मच्छिमारांचा अंदाज आहे. यावेळेला मान्सून लवकर येण्याची देखील चिन्हे आहेत.

मत्सजीव अभ्यासक स्वप्नजा मोहिते काय म्हणाल्या?

मत्सजीव अभ्यासक स्वप्नजा मोहिते म्हणाल्या की,'मच्छिमार बांधवांची समजूत अशी आहे की, मान्सूनची जवळ येतो, तेव्हा फेसचा रंग मातकट रंगाचा होतो. त्यावरून मच्छिमार हे आडाखे बांधतात की, पाऊस दहा-पंधरा दिवसात पाऊस येईल'.

'मान्सून येण्यापूर्वी लाटांची उंची वाढते. समुद्रातील खळबळ वाढते. समुद्रातील खाली पाणी वर उसळलं जातं. त्यामुळे समु्द्रातील जीवांना पोषक खाद्य मिळतं. त्यानंतर त्यांच्यात वाढ होते. हे चक्र व्यवस्थित होते. त्यावेळी पावसाळ्यात प्रजनन करणारे मासे हे खारफुटीजवळ अंडी किंवा प्रजननासाठी द्यायला येतात. असे वेगवेगळे बदल पाहायला मिळतात, असे त्या म्हणाल्या.

समुद्र आणि फेणीचा काय संबंध?

'समुद्रातील पाणी घुसळल्याने फेस येतो. पाण्याची घुसळन वाढते, त्यावेळी त्याचा मातकटपणा दिसतो. या गोष्टी आपल्याला पाऊस जवळ आल्याचे संकेत देतो, असेही त्यांनी सांगितले.

Edited By - Vishal Gangurde