- सचिन कदम

Raigad News : रायगड जिल्ह्यातील महाड येथे पुरसदृष्य परीस्थिती निर्माण झाली आहे. सावित्री, गांधारी आणि काळ नदीने धोक्याची पातळी ओलांडली आहे. महाड शहरातील सकल भागात पुराचे पाणी शिरले आहे. दरम्यान पाणी वाढण्याचा जोर कमी असल्याने जनजीवन सामन्य असले तरी प्रशासनाने नागरिकांना सतर्कतेचा इशारा दिला आहे.  (Maharashtra News)

रायगड जिल्ह्यात गेले तीन दिवस संततधार पाऊस पडत आहे. दक्षिण रायगडात माणगाव , म्हसळा, श्रीवर्धन, रोहा या तालुक्यात पावसाची संततधार सुरू आहे. महाड, पोलादपुर तालुक्यांमध्ये जोरदार पाऊस बरसत आहे. यामुळे कोलाड, रोहा, नागोठणे, पाली पसरीसरातुन वाहणाऱ्या कुंडलिका, पाताळगंगा या नद्यांनी इशारा पातळी ओलांडली आहे.

NDRF चे विशेष पथक दाखल

पावसाळ्यात (rain) रायगड जिल्ह्यात आप्पतीजनक परिस्थिती निर्माण झाली तर त्याचा मुकाबला करण्यासाठी NDRF चे विशेष पथक महाडमध्ये नुकतेच दाखल झाले आहे. जिल्ह्यातील महाड आणि पोलादपूर या दोन तालुक्यात दरड कोसळण्याचा धोका लक्षात घेऊन तर महाडमधील पुर परीस्थितीचा विचार करून NDRF चे हे पथक महाड येथे सज्ज ठेवण्यात आले आहे. एक इंस्पेक्टर 24 जवान आणि पीटर नावाच्या श्वानाचा या पथकामध्ये समावेश आहे अशी माहिती इंस्पेक्टर सुजितकुमार पासवान यांनी दिली.

पावसामुळे काय घडलं

महाड तालुक्यातील गोठे गावात मंगळवारी घर कोसळलं. संपुर्ण घर कोसळून लाखो रुपयांचे नुकसान झाले आहे. घर मालक चंद्रकांत मांजरेकर सुदैवाने बचावले आहेत. महसुल विभागामार्फत घराच्या नुकसानीच्या पंचनाम्याचे काम पुर्ण करण्यात आले.

० महाडमध्ये पुरपरीस्थितीत वाढ.

० शाळा महाविद्यालयांना सुट्टी.

० महाड शहरातील बाजारपेठेत शिरले पुराचे पाणी.

० पावसाची संततधार कायम

अतिवृष्टीच्या पार्श्वभूमीवर जिल्हाधिकारी डॉ. योगेश म्हसे यांनी जिल्ह्यातील सर्व शाळा व महाविद्यालयांना आज (बुधवार) सुट्टी जाहीर केली आहे.

Edited By : Siddharth Latkar