संदीप नागरे, साम टीव्ही

शैक्षणिक वर्ष २०२६-२७ साठी हिंगोली जिल्हा परिषदेच्या शिक्षण विभागाने शाळांच्या सुट्ट्यांचे अधिकृत नियोजन प्रसिद्ध केले आहे. यानुसार जिल्ह्यातील सर्व प्राथमिक, माध्यमिक आणि उच्च माध्यमिक शाळांना ५ नोव्हेंबर ते २३ नोव्हेंबर २०२६ या कालावधीत दिवाळीची सुट्टी जाहीर करण्यात आली आहे. विशेष म्हणजे, यंदाच्या शैक्षणिक वर्षात विद्यार्थ्यांना एकूण १२८ दिवस सुट्ट्या मिळणार असून २३७ दिवस शैक्षणिक कामकाज होणार आहे.

दिवाळीच्या सुट्ट्या २३ नोव्हेंबर रोजी संपणार आहेत. मात्र, २४ नोव्हेंबर रोजी गुरुनानक जयंतीनिमित्त सार्वजनिक सुट्टी असल्याने विद्यार्थ्यांना आणखी एक दिवस सुट्टी मिळणार आहे. त्यामुळे २५ नोव्हेंबर २०२६, बुधवारपासून जिल्ह्यातील सर्व शाळा नियमितपणे सुरू होतील. जिल्ह्यातील सर्व व्यवस्थापनांच्या आणि सर्व माध्यमांच्या शाळांसाठी हे नियोजन लागू असणार आहे.

कसे आहे सुट्ट्यांचे नियोजन?

शिक्षण विभागाने प्रसिद्ध केलेल्या नियोजनानुसार, ३६५ दिवसांच्या वर्षामध्ये एकूण १२८ दिवस सुट्ट्यांसाठी निश्चित करण्यात आले आहेत. यामध्ये ५२ रविवार, ५७ अन्य सार्वजनिक सुट्ट्या, जिल्हाधिकाऱ्यांच्या अधिकारातील ३ सुट्ट्या, संस्था किंवा शाळा स्तरावरील २ सुट्ट्या आणि दिवाळीच्या १४ सुट्ट्यांचा समावेश आहे. रविवार आणि इतर सार्वजनिक सुट्ट्या वगळून दिवाळीच्या सुट्ट्यांची गणना करण्यात आली आहे.

शैक्षणिक वर्षात २३७ कार्यदिवस

या नियोजनानुसार, विद्यार्थ्यांना आणि शिक्षकांना शैक्षणिक कामकाजासाठी एकूण २३७ दिवस मिळणार आहेत. सुट्ट्यांच्या कालावधीत विद्यार्थ्यांनी अभ्यासक्रमाचा सराव करावा, तसेच पर्यावरणपूरक उपक्रम राबवावेत, असे आवाहन शिक्षण विभागाच्या वतीने करण्यात आले आहे. दरम्यान, दिवाळीच्या सुट्ट्यांनंतर शाळा नेमक्या २५ नोव्हेंबरपासून सुरू होणार असल्याने पालक आणि विद्यार्थ्यांनी या अधिकृत वेळापत्रकानुसार आपल्या नियोजनात बदल करण्याचे आवाहन करण्यात आले आहे.