हिंगोली-परभणी राज्य मार्गावर मंगळवारी सायंकाळी सुमारे सात वाजण्याच्या सुमारास प्रवासी ऑटो रिक्षा आणि पिकअप वाहनाचा भीषण अपघात झाला. या दुर्घटनेत तिघांचा जागीच मृत्यू झाला असून, मृतांमध्ये दोन लहान मुलांचा समावेश असल्याची प्राथमिक माहिती समोर आली आहे. अपघातात पाचपेक्षा अधिक प्रवासी जखमी झाले असून, त्यापैकी काहींची प्रकृती गंभीर असल्याचे सांगण्यात येत आहे.

पोलिसांनी दिलेल्या प्राथमिक माहितीनुसार, औंढा येथून परभणीकडे प्रवाशांना घेऊन एक ऑटो रिक्षा जात होती. याच दरम्यान हिंगोली-परभणी राज्य मार्गावर ऑटो रिक्षाची पिकअप वाहनाला जोरदार धडक झाली. धडक इतकी भीषण होती की ऑटो रिक्षाचे मोठ्या प्रमाणात नुकसान झाले. या अपघातात ऑटोमधील तिघांचा घटनास्थळीच मृत्यू झाला.

अपघाताची माहिती मिळताच स्थानिक नागरिकांनी तातडीने घटनास्थळी धाव घेतली. नागरिक आणि पोलिसांच्या मदतीने जखमी प्रवाशांना ऑटोमधून बाहेर काढण्यात आले. त्यांना पुढील उपचारासाठी रुग्णालयात दाखल करण्यात आले आहे. जखमींपैकी काही जण गंभीर असल्याने मृतांचा आकडा वाढण्याची शक्यता व्यक्त केली जात आहे.

दरम्यान, अपघातातील मृत आणि जखमी प्रवाशांची ओळख पटवण्याचे काम स्थानिक पोलीस प्रशासनाकडून सुरू आहे. अपघातामुळे काही काळ या मार्गावरील वाहतूक विस्कळीत झाली होती. पोलिसांनी घटनास्थळी पंचनामा करून अपघाताची प्राथमिक माहिती नोंदवली आहे. या दुर्घटनेप्रकरणी संबंधित वाहनचालकांची माहिती घेतली जात असून, नेमका अपघात कशामुळे झाला, याचा तपास पोलीस करीत आहेत. या प्रकरणी गुन्हा दाखल करण्याची प्रक्रिया सुरू असल्याची माहिती पोलिसांनी दिली. या भीषण अपघातामुळे परिसरात हळहळ व्यक्त होत असून, दोन बालकांचा मृत्यू झाल्याने नागरिकांमध्ये शोककळा पसरली आहे. अपघातामागील नेमके कारण तपासानंतर स्पष्ट होणार आहे.