हिंगोली : दुकानात वेल्डिंगचे करण्याचे काम सुरू होते. हे काम करत असताना चार कामगारांना विजेचा जोरदार झटका बसला. यात एका कामगाराचा मृत्यू झाला तर अन्य तिघेजण गंभीर जखमी झाले आहेत. हि घटना औंढा शहरात घडली आहे. 

हिंगोलीच्या (Hingoli) औंढा शहरातील बस स्थानकाच्या पुढे एका दुकानाचे काम करत असताना हि घटना घडली आहे. चार जण मिळून दुकानात वेल्डिंगचे काम करत होते. हे काम करत असताना जवळच विद्युत प्रवाह सुरू असलेल्या तारेला कामगारांना स्पर्श झाला. यावेळी लोखंडाशी संपर्क असल्याने चारही जणांना जोरदार झटका (electric Shock) बसला आणि हे कामगार जमिनीवर कोसळले. यानंतर आजूबाजूच्या नागरिकांनी त्यांना लागलीच रुग्णालयात दाखल केले. 

नातेवाईकांचा आक्रोश 

रुग्णालयात दाखल केल्यानंतर एका कामगाराचा मृत्यू झाला. या घटनेत मृत्यू झालेल्या कामगाराचे शेख सरफराज असं नाव आहे. तर तिघे गंभीर जखमी असून त्यांच्यावर उपचार सुरु असून त्यांची प्रकृती स्थिर असल्याची माहिती उपचार करणाऱ्या डॉक्टरांनी दिली आहे. दरम्यान या घटनेनंतर नातेवाईकांनी हिंगोलीच्या शासकीय रुग्णालयात गर्दी केली होती. कामगाराचा मृत्यू झाल्याची बातमी नातेवाईकांना समजताच नातेवाईकांनी टाहो फोडला होता.