हिंगोली : चोरी करण्यासाठी चोरटे वेगवेगळी शक्कल लढवत असतात. रात्री दरोडा टाकण्यासोबत दिवसा घरोघरी जाऊन वेगवेगळे कारणांनी घरात घुसून चोरी करत असल्याचे प्रकार समोर आले आहेत. मात्र हिंगोली जिल्ह्यात चोरट्यांनी चोरी करण्याचा नवा फंडा सुरू केला आहे. एखाद्या व्यक्तीला गाठत पोलीस असल्याची बतावणी हे चोरटे करतात. यानंतर संधी मिळताच दागिने घेऊन पसार होत असल्याचे प्रकार घडले आहेत. 

हिंगोली जिल्ह्यात चोरी करणारी हि टोळी सक्रिय झाली होती. मागील काही दिवसात हे दागिने लांबविण्याचे प्रमाण वाढले होते. यात अंगावर दागिने असलेल्या व्यक्तींना गाठत आम्ही पोलिस आहोत. दागिने घालून कशाला फिरता; असे म्हणत दागिने काढायला लावून हात चालाखी करून दागिने लंपास करण्यात येत असल्याच्या घटना घडल्या आहेत. गेल्या आठ दिवसात चार ठिकाणी महिला व पुरुष नागरिकांना अशाप्रकारे लुटण्यात आल्याचे पुढे आले आहे.  

पोलिसात गुन्हा दाखल 

हिंगोली शहरातील बासंबा कॉर्नर, खटकाळी बायपाससह लिंबाळा एमआयडीसी परिसरात प्रत्येकी एक घटना घडली आहे. तर वसमत तालुक्यातील जवळा बाजार परिसरात नारायण शेळके या शेतकऱ्याच्या हातातील अंगठी चोरट्यांनी पळवल्याचे प्रकरण घडले आहे. दरम्यान या प्रकरणी पोलिसात गुन्हे दाखल झाले असून हिंगोली पोलिसांनसमोर या चोरट्यांनी आवाहन उभे केले आहे.

चोरीतील एक लाखांची रक्कम महिलेला मिळाली परत
यवतमाळ : यवतमाळच्या घाटंजी शहरा शहराजवळील स्टेट बँक जवळ पंधरा दिवसांपूर्वी भर दिवसा चोरी झाल्याची घटना घडली होती. या चोरी प्रकरणी घाटंजी पोलिसांनी तात्काळ तपास करून अवघ्या काही दिवसात गुन्हा उघडकीस आणला. विशेष म्हणजे चोरी गेलेली संपूर्ण एक लाख रुपयाची रक्कम अप्पर पोलीस अधीक्षक आणि ठाणेदार केशव ठाकरे यांच्या हस्ते फिर्यादी महिलेला अधिकृतरित्या परत करण्यात आली.