बीड जिल्ह्यातील गेवराई येथून एक धक्कादायक बातमी समोर येत आहे. पॅलेस्टाईन आणि गाझा पट्टीतील नागरिकांसाठी मदतीच्या नावाखाली जमा करून स्वतःच्या फायद्यासाठी वापरल्याचा धक्कादायक प्रकार उघडकीस आला आहे. हिमायत फाउंडेशनच्या माध्यमातून सोशल मीडियावरून निधी गोळा करणाऱ्या आरोपीविरोधात एटीएसने गुन्हा नोंदवला आहे.

कुरेशी शाहरुख उर्फ छोटू मिया (रा. राजगली, गेवराई) असे आरोपीचे नाव आहे. त्याने पॅलेस्टाईन आणि गाझा पट्टीतील नागरिकांसाठी मदतीच्या नावाखाली निधी जमा केला. हा निधी त्याने हिमायत फाउंडेशनच्या माध्यमातून सोशल मीडियावरून गोळा केल्याची माहिती तपासातून उघड झाली आहे.

परदेशातील उद्दिष्टांसाठी काम करण्याचा अधिकृत परवाना नसतानाही, हिमायत फाउंडेशन या एनजीओने सोशल मीडियावरून नागरिकांचा विश्वास संपादन केला. तसेच वैयक्तिक बँक खात्यांचा QR कोड वापरून लाखोंचा निधी जमा केला. जमा झालेला निधी स्वतःच्या फायद्यासाठी वापरल्याने अनेकांची फसवणूक झाल्याचे समोर आले.

देशभरात सध्या पाकिस्तानी आणि बांगलादेशी नागरिकांची शोधमोहिम सुरू आहे. अशातच हिमायत फाऊंडेशननेअधिकृत परवाना नसतानाही मदतीच्या नावाखाली निधी जमा करण्याचा प्रयत्न केल्याची माहिती उघडकीस झाल्यानंतर, याविरोधात तातडीने कारवाई करण्यात आली. या प्रकरणी गुन्हा नोंद करण्यात आला असून, पुढील तपास पोलिसांकडून सुरू आहे.