शेतकऱ्यांची चिंता वाढवणारी बातमी आहे. येत्या २४ तासांत राज्यात पुन्हा एकदा अवकाळी पावसाचा इशारा देण्यात आला आहे. मराठवाडा आणि विदर्भातील काही जिल्ह्यांमध्ये आज (८ मे) गुरुवार आणि उद्या हलका ते मध्यम स्वरुपाचा पाऊस होऊ शकतो, असा अंदाज हवामान खात्याने वर्तवला आहे. काही जिल्ह्यात गारपीट देखील होण्याची शक्यता आहे.

मागील काही दिवसांपासून राज्यातील हवामानात मोठे बदल होत आहे. नागरिकांना कधी उन्हाच्या झळा, तर कधी अवकाळी पावसाचा (Heavy Rain) सामना करावा लागत आहे. तापमानाचा पार चाळीशीपार गेला असताना मराठवाडा आणि विदर्भात अधून मधून अवकाळी पावसाच्या सरी देखील कोसळत आहेत.

या पावसाचा सर्वाधिक फटका फळबागांना बसला आहे. याशिवाय शेतीपिकांचं देखील मोठं नुकसान झालं आहे. दरम्यान, वाढत्या तापमानामुळे विदर्भावर उंच उंच ढग तयार होत आहेत. त्यामुळे ढगातील तापमान शून्य अंशांच्या खाली जाऊन गारांची निर्मिती होत आहे.

परिणामी आज गुरुवार आणि उद्या विदर्भातील अमरावती, नागपूर, वर्धा येथे गारपीट होण्याचा अंदाज वर्तवण्यात आला आहे. गारपिटीसह विदर्भ, मराठवाड्यात पुढील ४ दिवस सोसाट्याच्या वाऱ्यासह अवकाळी पावसाची (Rain Alert) शक्यता आहे.

आजपासून पुढील ४ दिवस विदर्भ आणि मराठवाड्यात मेघगर्जना, विजांच्या कडकडाटासह अवकाळी पाऊस होऊ शकतो, असा अंदाज हवामान खात्याने वर्तवला आहे. या काळात ताशी ३० ते ४० किमी वेगाने वारे वाहू शकतात, असंही हवामान खात्याने सांगितलं आहे. मराठवाड्यापेक्षा विदर्भात पावसाचा जोर अधिक राहू शकतो.