ओंकार कदम, सातारा प्रतिनिधी

Indian soldier dies before daughter birth in Satara : भारतीय सैन्य दलात कार्यरत असणाऱ्या जवानाचे साताऱ्यात अपघातामध्ये निधन झालेय. पत्नीच्या डिलिव्हरीसाठी सुट्टीवर आला होता, पण काळाने घाला घातला. साताऱ्यातील दरे गावावर शोककळा पसरली आहे.  प्रमोद परशुराम जाधव असे अपघाती निधन झालेल्या जवानाचे नाव आहे. त्यांच्यावर शासकीय इतमामात अंत्यसंस्कार करण्यात आले. लेकीचा जन्म होण्याआधी काही तास  प्रमोद परशुराम जाधव यांचं निधन झाल्याने हळहळ व्यक्त करण्यात येत आहे. काही तासापूर्वीच जन्मलेल्या बालिकेने घेतले आपल्या पित्याचे अंत्यदर्शन घेतले. हा क्षण प्रत्येकाचे काळीज चिरणारा ठरला.

सिकंदराबाद श्रीनगर येथे भारतीय सैन्य दलात कार्यरत असणाऱ्या जवानाचा साताऱ्यामध्ये अपघाती मृत्यू झाल्याची दुर्दैवी घटना घडली आहे. सातारा तालुक्यातील दरे या गावचे प्रमोद परशुराम जाधव असे जवानाचे नाव आहे. त्यांच्या पश्चात वडील त्यांची पत्नी आणि नवजात बालक (मुलगी) असा परिवार आहे.

वीर जवान प्रमोद यांना आई नसल्यामुळे पत्नीच्या डिलिव्हरीसाठी आठ दिवसापूर्वी सुट्टीवर गावी आले होते. यादरम्यान काही कामानिमित्त वाढे फाटा येथे दुचाकीवर जात असताना पुरुष भिक्षेकरी गृहाजवळ आयशर टेम्पोने त्यांच्या दुचाकीला जोरदार धडक दिली. या अपघातात जागीच मृत्यू झाला. यामुळे दरे गावासह परळी खोऱ्यात शोककळा पसरली.

आज सकाळी प्रमोद यांचे पार्थिव त्यांच्या मूळ गावी आणण्यात आले. या दरम्यानच त्यांच्या पत्नीने लहान मुलीला जन्म दिला. वीर जवान प्रमोद यांची अंत्ययात्रा अंत्य विधीच्या ठिकाणी पोहोचल्यानंतर वीर जवान प्रमोद यांची पत्नी आणि लहान बाळाला अंत्यविधीच्या ठिकाणी अंतदर्शनासाठी आणण्यात आले. हा क्षण पाहून अनेकांना अश्रू अनावर झाले... आज दुपारच्या सुमारास त्यांच्यावर शासकीय ईतमामात मानवंदना देऊन अंत्यसंस्कार करण्यात आले.