रणजीत माजगावकर

Maratha Andolan :

मराठा आरक्षणासाठी मराठा बांधव आक्रमक झाले आहे. राज्य सरकारला दिलेली डेडलाईन संपल्यानंतर ठिकठिकाणी मराठा समजाकडून आंदोलने केली जात आहे. तर राज्यातील नेत्यांनी देखील मराठा समाजाच्या रोषाला सामोरं जावं लागत आहे. नेत्यांना अनेक ठिकाणी मराठा बांधवांना प्रवेशबंदी केली आहे.

राष्ट्रवादीचे नेते आणि मंत्री हसन मुश्रीम यांना देखील मराठा समाजाच्या संतापाचा सामना करावा लागला आहे. कोल्हापूर जिल्ह्याच्या गारगोटीत मराठा समाजाने हसन मुश्रीफ यांची गाडी अडवली आणि घेराव घातला. मराठा समाजाला आरक्षणाच्या मुद्द्यावर सरकारने फसवल्याची भावना नागरिकांना व्यक्त केली. ('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

हसन मुश्रीफ यांनी देखील मराठा समाजाच्या भावना समजून घेतल्या आणि लवकरच मराठा समाजाला आरक्षण मिळणार असल्याचं आश्वासन दिलं आहे. मराठा आंदोलकांनी मंत्री हसन मुश्रीफ यांच्याकडे राजीनाम्याची देखील मागणी केली आहे. गारगोटी येथे आजपासून मराठा समाजाला आरक्षण मिळावे म्हणून साखळी उपोषणाला सुरुवात होणार आहे.

भाजप खासदाराची गाडी फोडली

नांदेडचे भाजप खासदार प्रताप पाटील चिखलीकर यांना देखील मराठा बांधवांच्या रोषाला सामोरं जावं लागलं आहे. खासदार प्रताप पाटील चिखलीकर गुरुवारी रात्री नांदेड येथील कंधार तालुक्यातील अंबुलगा गावात गेले होते. खासदार चिखलीकर गावात आल्याचं लक्षात येताच गावकरी आक्रमक झाले.

आरक्षण दिल्याशिवाय आमच्या गावात पाय ठेवू नका, असं म्हणत संतप्त आंदोलकांनी चिखलीकर यांना घेरलं. यावेळी संतप्त आंदोलकांनी चिखलीकर यांच्या ताफ्यातील दोन गाड्या देखील फोडल्या. दरम्यान, मराठा समाजाच आक्रमक झाल्याचं लक्षात येताच चिखलीकर यांनी तातडीने अंबुलगा गावातून काढता पाय घेतला.

अजित पवारांना बारामतीत प्रवेशबंदी?

राज्याचे उपमुख्यमंत्री अजित पवार यांना देखील प्रवेश बंदीला सामोरं जावं लागण्याची शक्यता आहे. कारण अजित पवार यांना त्यांचा बालेकिल्ला असलेल्या बारामतीत मराठा समाजाने प्रवेश बंदी केली आहे. मराठा क्रांती मोर्चाने तसं आवाहन अजित पवार यांना केलं आहे.